**السلام عليكم** 

**بعض السياق:**

واحد زميل لينا رافع في قناة الدفعة أنه القناة دي عندهم كورسات  ظابطة لطلاب الطب  وبتاع...إلخ، ف دخلت بدافع الفضول ولقيت عندهم هذا البوت إلي مليان كمية إدعاءات باطلة وخداع وإستقلال لجهل الناس وأكل أموال الناس بالباطل  ف ح أطرح كل كذبة لهم وأوضح وجه الكذب،  ورأي في الأخر، والسؤال هل أنا محق؟ ام أني عملت من الحبة قبة؟

أنا ماشي على حسب الترتيب الشايف أنه منطقي ب النسبة لي، ف اخر كذبة عبارة عن أكل لأموال الناس بالباطل، بالنسبة للصور:

**صورة 1** 

كل الكذبات على لسانهم.

**صورة 2:**

النموذج اللغوي الذي يستخدمونه

**صورة  3 و 4 و 5:**

**الأدلة على أكل أموال الناس بالباطل** 

**توضيح بشان نماذج الذكاء الصناعي وال api**

ممكن بشكل عام نقول أنه كل حاجة في الإنترنت تقع تحت قسم من إثنين:

1/ حاجة مغلقة المصدر:

ودي الاكواد بتاعتها نفسها مافي وصول ليها إلا للشركة المبرمجة وانت كمستخدم بس بتستخدم التطبيق، وممكن تشيل حاجة أسمها api ودي عبارة عن انك بتأخذ أذن لأستخدام التطبيق لكن على شكل واجه مختلفة، يعني مثلاً شات جي بي تي كلنا منستخدمه من الموقع الرسمي بتاعهم، بس ممكن زول يشيل api  ويعمل واجه موقع مختلفة ويخت فيها ال api  ويسمي  الواجهة دي مثلاً الزول، فأنت تتدخل موقع الزول وتستخدم الذكاء الصناعي كأنك داخل موقع شات جي بي تي الرسمي، بداية شات كان محظور في السودان وفي واحد في تويتر عمل الفكرة دي.

2/ حاجة مفتوحة المصدر:

ودي ما موضوعنا الأن، بس حتى دي فيها تقسيمات بس في العموم في نماذج ذكاء إصطناعي حالياً مفتوحة المصدر يعني أكوادها متوفر ليك تدربها على كيفك فهنا ممكن تدربها على نوع معين من المحتوى فتبقى متخصصه في هذا المحتوى فقط، والناس في الغرب حالياً قاعدين يدربوا نماذجهم براهم عشان يحافظوا على خصوصية بياناتهم ( في واحد في ريديت كان بيدرب نموذج عشان قال عنده 3 مليون مستند عايز يحولهم لصيغة رقمية وما عايز قوقل تشوف مستنداته )

**ننتقل للمزاعم ( الكذب )** 

**المزعم الأول:**

ما قاعدين يوضحوا في أي جزء من الرسائل أو البوت أنهم ما بنوا النموذج اللغوي  من الصفر إنما أستخدموا نموذج جاهز، وهنا بتفرق شديد لأنه بيدعوا أنه النموذج مخصص للإجابات الطبية ودا ليس صحيح اي نموذج لغوي ( زي شات GPT او Gemini ) تم تدريبهم على مجموعة كبيرة من البيانات المختلفة فهم مش متخصصين في مجال معين إنما عندهم معرفة في كل مجال وبيسموه نموذج لغوي عام، فإذا البوت بتاعهم بيستخدم مجرد نموذج لغوي عام متوفر على الإنترنت  بيخلي مافي فرق بينه وبين أي نموذج لغوي تاني.

**المزعم الثاني:**

يقولون:

" 🔵 قمنا بعمل تحسينات كبيرة بخصوص الردود 💬 و اللغة الطبيعية للبوت حتى يتفاعل مع المستخدمين بصورة أكثر سلاسة 💙✨

(يعني بيقدر يتونس معاك ما زي زمان 😂) "

 

ودي كذبة عشان هم زي ما قلت وزي ما موضح في الصورة الثانية معتمدين على نموذج

Claude 3.5 Sonnet

فما عندهم اي قدرة بنفسهم يعدلوا في النموذج اللغوي، مفروض يقولوا أنه الشركة إلي نحن ماخدين منها ال api طورت النموذج، بس هم في الكذبة الأولى لا يوضحون للناس أنهم مش إلي بنوا النموذج.

**المزعم الثالث أكل أموال الناس بالباطل:**

**يقولون:**

" للمشتركين ممكن ترسل 10 صور في نفس اللحظة و البوت حيبحث و يقرا و يجاوب عليهم كلهم في نفس الوقت ❤️🔥 (كأنه عندك 10 بوتات كل واحد بيبحث و بيجاوب في موضوع براه 😭❤️🔥) "

**بالمشتركين** قصدهم اشتراك شهري مثداره 10 الف جنيه سوداني - راجع الصورة 3 - وايه ميزات هذا الاشتراك؟

الميزة الواضحة أنك تقدر ترسل 10 صور دفعة واحده- واوااااا

بس النموذج  الي هم معتمدين عليه وماخدين منه ال api أصلا بدون اشتراك - مجاناً - بيخليك ترسل 10 صور، بل أنا في نفس اللمحادثة رسلت 10 صور مرتين ولسه ما قال لي ممنوع ترسل بس اأنا كسلت أكمل -  راجع الصور 4 و 5 -

برضو المستخدم المجاني عنده عدد رسائل معينة في اليوم، مع أنه النموذج إلي هم ماخدين ال api منه ما عنده حد استخدام.

**إذا ما الإستنتاج؟**

الناس ديل قاعدين يستخدموا نموذج لغوي  عام ومليون خط تحت كلمة عام مجاني - النموذج مجاني ال api بقروش - وبيخدعوا الناس أنه نموذج مخصص للأسئلة الطبية، وبيتم تحويل ميزات مجانية زي عدد الرسائل ورفع الصور لميزات مدفوعة، مع أنه المستخدم ممكن يحمل التطبيق بشكل مجاني، ودا أكل لأموال المسلمين بالباطل، هل تعلم أنه اليهود حلال عندهم أنك تأخذ ربا من غير اليهودي لكن حرام من يهودي زيك، يرضيك تسرق أخوك اليهودي؟

والناس دي بتستغل جهل أخوانهم المسلمين!

**ملاحظة**

الناس دي برضو بتوفر أسئلة أمتحانات مدفوع وبناءً على كل ما رأيته ( أتوكع) أنهم مكركين هذه الأسئلة وبيبعوها للناس، دا لو ما كانت أصلاً مجانية.

وفي ملاحظة تانية، في منشوراتهم كانوا عاملين مسابقة ما وفي أسئلة في مواد طب، ونشروا أسماء الفائزين وكانوا 10، وكلهم بنات! نعم نشبة البنات للأولاد أكثر في المجال ( على حسب ملاحظتي البسطية المقتصرة هلى الكلية بتاعتي ) ف أعتقد أنهم بيستقلوا جهل البنات التقني في بيع منتجاتهم.

هل أنا على حق أم عملت من الحبة قبة؟