الرقصة الاخيرة

عيشت شهر من اصعب ايام حياتي .. بتعرف فيه علي نفسي من أول و جديد .. اصعب جزء اتعرفت عليه اني طلعت السئ في روايات الكل .. و الاصعب رواية الناس اللي بحبهم او اللي كانت فاكر اني بحبهم .. انا مش بحب الناس و شوفت منهم كتير اذى و اتولدت في بيئة النجاة كانت فيها صعبة .. صدمات كتير كلها كانت بتقولي اني فيا نقص ما و اني حاجة لازم تتدارى و تستخبى دايما حاسس اني مليش نصيب في الكيكة و مستحقش حتى الهواء اللي بتنفسه .. كل ده مخلقش مني انسان حلو زي ما كنت فاكر .. خلق مني انسان هربان من ذاته و مشاعره عن طريق انه يخدر بأي حاجة حتى لو ببنى ادم غيره .. كل الناس في عينيه اداة ..

اكتر حد اتاذى مني كنت فاكر اني اكتر حد اتاذيت منه .. دمرتلها حياتها و نفسيتها و لما جت ترد كل اللي انا عملته بانها تسيبني .. عيشت دور الضحية و قد هي مقدرتش اللي عملته علشانها مع اني في الحقيقة عملت كل حاجة علشاني انا

انا مبقتش عارف انا مين و توهت جامد .. بس كلام في سرك انت الحاجة الوحيدة اللي مش بعرف اختلف عليها بعقلي .. انت الحاجة الوحيدة اللي كنت عاوز اصلح كل حاجة علشان بس انفع لها .. بس لسه واقف مكاني

بستغرب انسانيتك و طيبتك و انت مستعدة تقدمي كل حاجة بس علشان اكون كويس .. نفسي افهم بتشوفيني ازاي .. في عز ما كنت بحكيلك عن قرفي نظرتك ليا مش بتتغير .. قدمتيلي حاجات معرفتش اقدمها لنفسي حتى و انا بقولك اي حاجة مستنى توبخيني او تقولي اي حاجة توجعني و الاقيكي بتكسبي بتربيتك و اخلاقك و تفهمك

انا لسه عند كلامي انت تستاهلي حد احسن بكتير مني .. تستحقي حد يعرف يقدملك اللي تتمنيه و اللي هو عمره ما كان كتير .. بس يمكن انا جيبي مخروم مكنش عندي حاجة اقدمها غير وجع القلب ..

كل ما تيجي علي بالي بدعيلك الدعوة اللي انت كنت دعيتي بيها قبل كده .. ربنا يمحيني من ذكراكي و يكتبلك الخير .. ليه رجعت اكتبلك .. مبطلتش اكتبلك بس ده كلام محبوس جوايا و نفسي اقوله و خوفت يكتم علي نفسي و اموت بيه