واش تتناقشو كي تتخطبو

يحيّرني واحد كي يخطب وحدة يبدا يشرط عليها تطبخ وتغسل وتدير الميناج وهادوك الأمور البديهية، ولا وحدة يخطبها واحد تشرط عليه يخدم ويسكنو وحدهم.. ويبقاو يتناقشو في هاد الأمور ويصراو مشاكل وخلافات وبلاك تبطل الخطبة من أساسها من وراء هاد النقاشات،

​

الموضوع تاع تطبخ وتغسل هادو أمور تديرهم هي وحدها وبمحبة خاطر وتقوم بيتها بلا ما واحد يقولها ولا يشرط عليها خاصة لما تلقى واحد راجل بمعنى الكلمة، وهادي تاع يخدم ويسكنو وحدهم تاني أمور بديهية يعني من المفروض يتوفرو وحدهم بلا ما نهدرو عليهم ونشرطوهم لأنهم ضروريات،

​

الناس تتناقش على العقلية على كيفية التعامل على المواقف والاختلافات في التربية والبيئة اللي نشأ فيها كل واحد على المعتقدات الدينية على المبادئ اللي تنص على الشريعة والسنة، هادو اللي لازم نتحاورو فيهم.. مش على الماكلة والصانيبو والحيوط، باينة راح تطبخلك مش راح تموتو بالجوع مع شوي معاونة وباينة لازم يخدم مش راح يصرفو عليه الجيران، ولا واش راح نسميو ولادنا ونقعدو عام مانجيبوش لولاد خلي نعيشو فيه مع وحدنا نستمتعو وأقوال مسيلمة الكذاب وخوه،

​

عارف أن العادات التافهة اللي ورثوهالنا الكهول هي اللي تأثر على الناس لكن لازم نتخلصو من هاد التبعية الفكرية ونرتقيو في لغة الحوار والتفاهم، حتى الخلافات اللي ممكن تحدث لازم تكون خلافات راقية مش خلافات على مهيبة وتطبخلي ودار وحدي، يجب أن نحيا بمعنى لا بثرثرة.

​