تجربة اولى و اخيرة سيئة جداً

في شي عالق في دماغي في اخر شهور و الحق هو مأثر عليا نفسياً

نبي نشاركه مع اشخاص عشوائيين ممكن الكلام يساعد شوية

انا هاذك النوع من الشباب لي مايعترفش بحاجة تسمى ( حب ) و نظرتي له هو مجرد عادة تتكون بوجود شخص ما في حياتك

انا عندي تجارب واجد زيي زي اي حد في عمري يلي هو حالياً 25 سنة

من سن مبكر دخلت علاقات واجد و كلها عابرة و في منها وصل للجنس و في وحدة من العلاقات وصلت للحمل ( هذا مش شي نتفاخر بيه لكن نبي نعطيكم نبذة بسيطة عن نفسي )

و كل العلاقات كانت طبيعية جدا و تكون معروف نهايتها شنو من الطرفين

الا علاقة وحدة بدت معايا من 2022 مع انسانة اقل ما يقال عنها انها amazing

هي كانت صغيرة وقتها و عمرها 18 سنة و انا كنت مش واخذها على محمل الجد في اول شهور مع انها كانت انسانة كويسة إلى ابعد حد و شخص متفهم و داعم و محب

حاولت اني نبعد عنها بدون ما نجرحها و فهمتها إن نحن مانصلحوش لبعضنا ( انا انسان غير مبالي و ماعنديش شي جديات في حياتي و نظام حياتي سيء و غير ملائم لها )

و ماكنتش موهمها بأي شي ولا واعدها ولا مفهمها إني نحبها

كل لي كنت نحاول نوصله لها إني غير ملائم لها بس بدون ما نجرحها ولا نكون بذيء او سيء معاها

و في نفس الفترة هذي هي كانت تمر بظروف اجتماعية صعبة جدا بسبب وفاة امها شوي مشاكل عائلية لا داعي لذكرها

يوم من الايام تناقشنا بجدية و قلتلها الآتي :

( انا يا بنت الناس شخص غير جدي و غير طامح في الزواج و مانحاولش نجرحك بأي شكل و انتي انسانة كويسة جدا و مافيش شخص يقدر يرفضك سواء شكلاً او روحاً فـ لو حابة تخليني في حياتك اعتبريني شخص عادي جداً كأخ او صديق بدون ما يكون في اي نوع من العلاقة بينا )

هي ماحاولتش ترد و تجنبت النقاش في الموضوع هذا

لكن بعد يومين رجعت و حكتلي قالتلي نحن حاليا معرفتنا لها تقريباً 8 اشهر و انا تعودت علي وجودك يلي يخفف عليا في اعباء الواقع حتى و لو بنسبة بسيطة و نبيك تكون في حياتي لكن اختار انت أي طريقة تعجبك بس المهم اقعد فيها

قلتلها تمام و مش مشكلة و قعدنا نتكلموا من مدة و مدة معش قعدنا يومي زي قبل

لكن اهتمامها بتفاصيلي كان كلما له كلما يزيد ،و سؤالها عني و احوالي كان ادق و اكثر

ماكانتش تسأل ولا تبعث في رسالة الا لما انا نكلمها كإنه شخص قاعد يراقب فيك و يراجي فيك تكلمه و يبي يعرف عليك كل شي

استمرت الفترة و قعدنا نتكلموا اكثر و نقربوا من بعضنا اكثر و اكثر

الى أن جاء يوم و انا ماكنتش في وعيي ( هي ماكانتش تعرف اني سكران ) عشان نكون صادق معاكم و كنا نتكلموا و صارت زلة لسان قلتلها انتي شخص ينحب و انا ماعمره انسان كان مهتم معايا بالطريقة هذي و علاقاتي و معارفي بالنساء كانت كلها عابرة و سطحية الا انتي و الكلام هذا كان حقيقي لكن ماكنتش في وعيي و انا نقول فيه

نتذكر انها طارت من الفرحة و معش عرفت شن تقول و استمرينا نتكلموا الى ان خذاني النوم

وعيت ثاني يوم حسيتها فرحانة الى ابعد حد و كانت تمهدلي في الموضوع و تلمحلي عليه

و انا كنت عارف اني غلطت امس و عطيتها فرصة تقرب مني اكثر بس بحكم انها هي انسانة كويسة قلت نعطيها فرصة و ممكن يكون الخيار الصح

استمرت علاقتنا تقريبا سنة و نص من بعد الـ 8 اشهر لي كانت مجرد معرفة سطحية

تطورت العلاقة و حبينا بعضنا و حسيت روحي مع الشخص الصح و اعترفتلها بكل اخطاءي و خذيت عهد على نفسي اني نسيب العادات السيئة و بديت في التقدم خطوة بخطوة و بديت نأسس في حياتي بناء عليها و بدت مرحلة بني الحوش و قطعت فيه شوط كويس بدون مساعدة حد ( الكلام هذا كله و انا مازلت في عمر 23 سنة ) و كنت راسم إني مع بداية الـ 26 سنة من عمري نكون متزوجها

قعدت نشوف في العلاقة تكون اعمق يوم بعد يوم

قعدت نشوف في كل قطرة عرق من الشغل هي درجة للوصول لها

قعدت نشوف في كل بلوكة في الحوش خطوة للقرب منها

و من بعد سنة و نص تقريبا يلي هو في سنة 2024 هي كانت تخطت مشاكلها العائلية و رجعت لحوش اهلها

و مع رجعتها صار شي حطم كل حاجة و كل شعور في داخلي تجاهها و حسيت بالخذلان

اختفت عليا مدة يومين كاملين بدون ولا رسالة ولا مكالمة و بدون ما نفهم شي

بعد اليومين اتصلت بيا في مكالمة مدتها 15 دقيقة حطمت سنتين من المعرفة و العلاقة العميقة و الجميلة

مضمون المكالمة ان في شخص تقدملها تقليدي و بحكم صعوبة عائلتها و عاداتهم هي كانت مجبورة توافق

( السيناريو المتعارف عليه دائماً لما يبي يصير البيوع )

حاولت نستفسر منها و قدمتلها حلول للموضوع و تمسكت بيها لأخر رمق هي كانت تحاول تقنعني ان جميع الحلول فاشلة

هنا انا فهمت إني كنت مجرد لعبة او بالأصح كنت مسكن آلام لمشاكلها العائلية يلي تلجأ له بعد تضغط عليها الحياة

تحطمت كل الآمال و كل المخططات لمستقبل مع انسانة في نظري كانت كويسة

حسيت ان تعبي و شغلي لي كان يوصل لـ 16 ساعة في اليوم راح هباء منثور

الاحلام الوردية كلها قعدت كوابيس سوداء

مانكذبش عليكم انا انسان طبعي صعب و مانقدرش نمشي ضربة بدون ما ندفعك ثمنها و نذوقك عليها الويل مهما كنت انسان قريب عليا

عدت مدة شهرين و جتني رسالة منها و مفادها انها كانت مستنية اللحظة لي تاخذ فيها تلفونها و تكلمني على اساس تلفونها كان عند بوها

مارديتش عليها لمدة يومين و استمرت الرسائل توصلني على الواتس و انا مانبيش نرد

قلت هذي فرصتي ناخذ الثار بس بطريقتي

رجعت تكلمت معاها و كانت تمثل انها في قمة السعادة ،و قالتلي انا خربت كل شي مع الشخص لي تقدملي و الموضوع سببلي مشاكل مع والدي كله عشان نرجعلك

قلتلها تمام و مثلت اني حتى انا كنت نراجي في اليوم هذا

في نفس اليوم كنت نتكلم انا و هي ،سمعت وحدة جنبها دخلت عليها الدار قالتلها ( مازلتي تكلمي في فلان ؟ ) و القصد بفلان الشخص يلي كان متقدملها و فركشت معاه

درت روحي ما سمعت شي و مثلت عبيط و استمرت الايام ردت علاقتنا كيف قبل و أحسن

جربت نسألها على الشخص الآخر لو كانت تكلمت معاه في فترة الخطبة او كذا قلت خليني نشوف هل تكذب عليا ولالا و جاوبت كم مرة بالنفي و قالت انها ماكانتش قادرة تتقبله و لا قدرت تحكي معاه

مع ان سؤال هاذك الانسانة يلي دخلت عليها الدار كان بطريقة شخص متفاجئ و هازئ في نفس الوقت ( كإنها تقوللها تلفي تلفي و ترجعيله فلان يلي كان خاطبك )

المهم رفضها كم مرة اكدلي انها كانت تلعب بيا

عدت الايام و تلاقينا برا كم مرة مع ان في الفترة يلي كانت قبل الخطبة ماكنتش نفكر اننا نتلاقوا ولا نطلعوا مع بعضنا

المهم تلاقينا و طلعنا مع بعضنا في السيارة اكثر من مرة ( بدون ما تصير اي تجاوزات ) و هي مازالت مصدقة اني نبيها و هي تشوف في علاقتنا تكبر و انا نشوف في الثار يكبر

خلاص وصلت مرحلة كويسة جدا معاها و على الصعيد الشخصي اسست نفسي و نعتبر ناجح بعرق جبيني و لله الحمد و مستعد اني نكون عائلة و نعتمد على نفسي و شغلي

الى ان جاء شهر فبراير يلي فات و قررت اني نذوقها طعم المرارة يلي ذقته انا قبل سنتين

حطيتها تحت الامر الواقع و انفصلت عليها و قلتلها علاقتنا مش مكتوبلها تستمر مع ان على عينها كانت تشوف فيا خلاص وصلت للمرحلة النهائية و على نهاية السنة الحالية ممكن نكونوا متزوجين

لكن انفصلت عنها و درت يلي في غايتي

و مع هذا كله انا حاليا حاس بالذنب و نقول ليش انتقمت بالطريقة هذي و ليش درت هكي هل الحقد و الكره عماني للدرجة هذي و حسيت بندم كبير

المفروض ماكنتش رديت عليها ولا فتحتلها مجال انها ترجع و كانت مع الوقت حتعرف غلطتها و تعرف إني كنت انسان صادق

.....