رأي يجوز ما يعجب هواية ناس: جيلنا الحالي مو "مظلوم"، بل هو أكثر جيل متدلع وهش بالتاريخ

هاي امس چنت كاعدة وية جدتي، وضلت تسولفلي وشلون عاشت اغلب أيام شبابها. چانت تحچيلي عن التعب والضيم اللي شافته كإمرأة أرملة بعز شبابها، شلون چانت تواجه المجتمع وتشتغل ليل مع نهار حتى تطلع لقمة حلال وتكبر أطفالها وماتمد إيدها لأحد. وهي تسولف صفنت وبس افكر: إحنا شگد دلوعين ونقنقين

كلما أفتح السوشيال ميديا، أشوف منشورات وتغريدات تبچي وتشتكي من ضيم الحياة والوضع الحالي. بس خلونا نكون صريحين! أهلنا وأجدادنا عاشوا ظروف أصعب منا بمليون مرة. عاشوا حروب، وحصار، وفقر، وما چان عدهم لا تكنولوجيا ولا إنترنت ولا ربع الرفاهية الموجودة هسة، وطلعوا زلم ونساء يهدون الحيل.

جيلنا اليوم(ولو مو كلها عايشه نفس الشي)، كاعد بغرفته، التبريد مشتغل، وبضغطة زر وحدة بالتلفون يوصله الأكل واللبس، وكلشي متوفر إله. ومع ذلك، هو أكثر جيل يتذمر، وأكثر جيل يعاني من الاكتئاب والملل والـ 'احتراق النفسي'.

برأيي، المشكلة مو بصعوبة الحياة، المشكلة بضعف قدرتنا إحنا على التحمل، لأن صرنا جيل ترف حيل وبسرعة ننكسر من أي ضغط بسيط.