بما ان خلصت سادس وعندي فراغ قاتل راح احجي كل تجربتي بتفاصيلها من اول يوم لاخر امتحان وزاري

الفصل الاول: بداية مبهمة

٢٠٢٤/٦/١ جان اول يوم بالسادس ويمثل بداية سقوطي بالغيبوبة
ما كنت مهتم الصراحة وماعرف المدرسين وشنو النظام وطبيعة المواد لكن كان عندي خوف وقلق مثل المشاهد الي تكون في بداية اي فلم رعب
بصباح هذا اليوم رحت للمعهد لاول مرة بحياتي ودخلت شفت الطلاب هم حايرين وعلى وجوههم واضح التوتر وما نندل القاعات، بعدها دخلت لاول محاضرة اتذكر كانت فيزياء والمدرس كان يشرحلنا عن طبيعة المادة وهيج الى ان خلصت المحاضرة وعلى طول رجعت للبيت معصب ومنزعج من نظام المعهد والحضوري ف من اول يوم قررت احول للالكتروني

بديت ادرس واتعرف على المواد (كنت ناجح للخامس ومسجل ٣ مواد بس) جان يراودني شعور غريبب جدا كانت تجيني مشاعر حنين الى الماضي، لاصغر التفاصيل بطفولتي، لاتفه شي روتيني كنت اسويه بحياتي قبل السادس وية هذا الشعور مال النوستالجيا تماما، وكنت بعض الاحيان ابجي واحس بثقل على صدري بدون سبب

الفصل الثاني: التأقلم

بعدها بشهرين ثلاثة كلت هو اني هستوني رايح للخامس على شنو حارق اعصابي ومكبر الموضوع بهذا الشكل المخيف
ف تعايشت وتأقلمت وية الموضوع وصار روتين من يومي ان ادرس وراها اكمل حياتي طبيعي
اجة الدوام وصرت خامس وداومت وهنا برزت عندي مشكلة كنت قلق منها، الي هي التضارب بين الخامس والتزامي بمواد السادس

بالبداية واجهت صعوبة وشفتها مستحيلة بس بنفس الوقت شديت الهمة وكلت طز راح اقرة واسوي الي علية وها اها
ما اطول عليكم، طلعت الاول بالخامس كان معدلي ٩٩ واعفاء عام كانت اجمل مرحلة دراسية بحياتي وتعرفت بيها على اصدقاء جدا لطيفين ابد ما كنت احلم اصادقهم بيوم من الايام، بس ما كنت جدا راضي عن ادائي بمواد السادس.

الفصل الثالث: رسميا سادس

بعدما انعفيت بالخامس هنا اعتبرها البداية الحقيقية والجدية الية وية السادس

صار عندي باكراوند عن المنصات والمدرسين وشلون اختار وشلون ادرس بشكل صحيح
حطيت الية جدول بمسمى مختصر MAP بقيت ماشي عليه لنهاية السادس ودرست يوم بيومه وهذا كان اعظم شي سويته بالسادس والحمدلله ما كان عندي اي تراكمات وهذا الشي الي خلاني ارتاح نوعا ما، كنت متفوق جدا بالدورات واحصل شهادات تقديرية

اجة سبتمبر ٢٠٢٥ وبدء دوام المدارس، كان يوم حلو من ناحية اجواء الاصدقاء والونسة لكن ما حبيت طبيعة التدريس ف باختصار سويت انتساب وانهيت موضوع المدرسة.

الفصل الرابع: فترة المراجعة

بعد ما كامت المواد تخلص وتسقط وحدة ورة الثانية كنت اشعر بانجاز عظيم وية اخر محاضرة من كل مادة بأني وصلت لهذا المكان بهاي السلاسة وبدون تراكم

٢٠٢٦/٤/١ كان اول يوم بفترة المراجعة، كنت جدا متحمس الها وشلون كنت اخلي خطط وجداول وبهاي الفترة تعرفت على اصدقاء كلش حبابين تحياتي الهم اذا دتقرون البوست احبكم

اسوء شي واجهني بهاي الفترة هو الخمول الي اجاني من العدم كنت يومية اصارع نفسي على القراية مو وية القراية نفسها والايام كانت تمشي وصارت عندي هفوات كلش كبيرة واكو مواد تجاوزت حدودها من الجدول هنا حسيت بالخطر والارتباك لحد ما خلصت المراجعة الاولى يوم ٢٠٢٦/٥/٢٠ واني ما مقتنع بمراجعتي بيها

الفصل الخامس: الحد الفاصل

ما راح تصدكوني اذا كلتلكم ٢١ يوم غيرت مسار اللعبة بالكامل ونقلتني من حال الى حال !

خلال هاي الفترة القصيرة راجعت كل المواد بقوة بحيث ضغطت هواية على نفسي لدرجة الاحتراق لان هاي فرصتي الوحيدة ان اوصل لهدفي واحقق حلمي (الطب) الي بدون مبالغة كنت يوميا من بداية السادس افكر بيه وادعي ربي يدخلني طب واقره عنه واباوع على ريلز مال طلاب طب واتمنى لو اني بمكانهم

الفصل الاخير: سبع حصوات

ساعة الصفر ٢٠٢٦/٦/١٣ هذا كان اول يوم امتحان وزاري رحت بدون نوم وية قلق وخوف فضيع وكمية افكار سلبية هائلة، كانوا اهلي كلهم سهرانين وياية والبيت مشحون لكن بهدوء عجيب

دخلت للقاعة كعدت على الستول واني بس ادعي واهدئ بنفسي الى ان توزعت الاسئلة لكن ما قريتها كلها، خليت الدفتر فوقها وبديت احل سؤال ورة سؤال شو هاي سهلة وكلها واضحة الحمدلله هنا كلش اطمئنيت لحد ما كملت حل وطلعت واني الكاع مشايلتني من الفرح والراحة الي اني بيها، حسيت روحي هاهية خلصت سادس

وعلى هذا الحال امتحان ورة امتحان، كنت متقلب المزاج جدا وعصبي وعانيت انهيارات عصبية هواية خلال ذني الاسبوعين، بوسط الفوضى والسلبية مال السوشيال ميديا والاسئلة صعبة والاسئلة هيج وهيج اني كنت عايش بقوقعة بعيد عن اي بشر

الامتحان الاخير:

هذا حرفيا كان الاستيقاظ من الغيبوبة الي سقطت فيها بالفصل الاول من البوست
كان اسعد يوم بحياتي
كنت اشعر بكل شجرة بكل فراشة بكل طير يطير فوق راسي احس كلهم فرحانين وياية ويتراقصون
طلعت من المركز وماسمع بس ام كلثوم تصرخ باذاني (اعطني حريتي اطلق يدي)
شكد ماتكلم عنه ما اوفي حق الشعور الي جربه يعرف عن شنو داتكلم

وعلى گولتهم، راح السادس وشمرت سبع حصوات وراه

وبعدها رجعت لنفس الفراغ الي كان بحياتي قبل يوم ٢٠٢٤/٦/١ ومنتظر النتائج وخايف شوية وبنفس الوقت متحمس

وداكتب هذا البوست الي اتوقع محد راح يقراه لكن احب اكول للي كمله فدوة لقلبك على كل ثانية انطيتها الي من خلال قرائتك تلخيص لاهم مرحلة بحياتي الشخصية 🫂🤍