الشغل و الجواز

انا بنت في سن جواز يعتبر و اتعرفت ع كذه حد بس مؤخرا محتارة شوية ف النقطة دي. انتو شايفين المفروض تمشي ازاي؟ انا عارفه انها حاجه فردية اوي بس انا عايزة اراء.

انا مثلا طبيبة و مش عايزة اسيب شغلي مش حبا فيه بس الدنيا مش مضمونة الصراحة و محبش خالص بعد تجربة فاشلة الاقي نفسي معييش حاجة و ارجع لاهلي يصرفو عليا.

انا السيناريو ف دماغي هيكون هو عليه اغلب للمصاريف و انا عليا اغلب شغل البيت زي الطبيخ و الكنيس و القعدة بالعيال ف المستقبل و نساعد بعض لو حد احتاج حاجة يعني الدنيا مش ماشية مسطرة بس كنت بتعرف على حد مؤخرا و كان متضايق اني قلت ان ممكن لو شغلي ٣ او ٤ ايام معرفش اعمله فطار الصبح و انه ممكن يفطر نفسه. قالي كلام فيما معناه ان اولوياتي مش مزبوطة و ان شغلي مش اساسي وو اني كده بقصر. بس ما طبيعي يعني ايام الشغل مقدرش ادي نفس مجهود ست البيت ممكن رأيكم هل تفكيري فعلا مش سليم؟ انا مش ضد اني اشارك ف المصاريف لو هو محتاجني او حتى من نفسي لو حابة اريحه مثلا بس اكيد مش عايزة يكون العادي اني بصرف معاه حتى لو بشتغل.