تربية الأطفال بمجتمعاتنا هو انعكاس للصورة اللي الناس تبي تشوفنا فيها

وهذا طبيعي طبعًا، لأن نحس إن أطفالنا انعكاس لصورتنا، وحنا دايم نبي صورتنا على أفضل ما يكون أمام العالم…الخطأ إننا نحاسب ونربي أطفالنا كأننا بعمر بعض، أوقات كثير نبيهم يتصرفون بعمرنا اللي يكون بالعشرينات وما فوق وهم أقل من ١٠ سنوات جزء منها راح بتعلم الأساسيات مثل المشي ومسك الملعقة والكلام، وهذا يضغط على أطفالنا بشكل يخليهم أكثر قلق وتوتر، ويوتر علاقتنا فيهم لأننا طول الوقت نحاسبهم ونقومهم بدل ما نتذكر إنهم مجرد أطفال عندهم الرغبة بالتجربة والحرية من المحاسبة الاجتماعية على تصرفاتهم الطفولية
أنا ما أقصد تعليمهم إن الضرب خطأ، أو التنمر خطأ، أو احترام المقدسات الدينية واجب مع إن حتى الدين يسامحهم ولنا بقصص الرسول عليه الصلاة والسلام أسوة…
تذكروا إن حنا مانربي أطفالنا عشان يكونون واجهات اجتماعية، حنا نربيهم عشان يكبرون بشكل صحي يجربون ويتعلمون، خليهم ياخذون مساحتهم الشخصية للعب والضحك والتعلم، خليهم يجربون الخطأ وردات الفعل السيئة من الناس اللي حولهم وخلكم موجودين دائمًا ملجأ للأمان والحب، خليهم يبكون ترى عادي وطبيعي مدري ليش يزعجكم هالشي!😅
هذا يبني لهم شخصيات مستقلة وأكثر تصالح وراحة مع نفسها