ليه بدعي ربنا كتير ومش بيستجيب ليا؟

بسم الله والصلاة والسلام علي رسول الله

كتير مننا بيمر بفترات بيحس فيها إن دعائه معلق وإنه بيدعي كتير ومفيش حاجة بتتغير بس هل سألت نفسك قبل كده عن شكل يقينك وأنت رافع إيدك لربنا؟

الحقيقة الإيمانية هي ان لو عندك ذرة شك واحدة بنسبة 1% إن ربنا مش هيستجيب لك فغالباً مش هيستجاب لك

ليه؟ لأن الدعاء في الإسلام مش تجرِبة بتعملها عشان تشوف هتنجح ولا لا الدعاء هو قمة العبادة والتسليم.

النبي ﷺ حسم هذا الأمر في جملة واحدة واضحة وصريحة

«ادْعُوا اللَّهَ وَأَنْتُمْ مُوقِنُونَ بِالإِجَابَةِ»

اليقين معناه أنا بدعي وأنا شايف الإجابة جاية في الطريق بعين قلبي لأن اللي وُعدت بيه هو الله الصادق الكريم أما لما تدعي بلسانك وقلبك بيقول أهو أنا بدعي وخلاص لما نشوف فالحقيقة إنك مش بتدعي أنت بتختبر القدر! واللّه سبحانه وتعالى يقول في الحديث القدسي «أَنَا عِنْدَ ظَنِّ عَبْدِي بِي»؛ فإذا ظننت به الإجابة أكرمك، وإذا شككت وترددت، وَكلك الله إلى شكك ونفسك.

طب ازاي احصل علي اليقين التام ده؟

طهور القلب والنفس

القلب المليان بغل، أو حسد، أو كبر أو متعلق بذنوب ومعاصي ومطاعم حرام بيبقى عامل زي الشاشة المغبشة مش بيشوف أنوار اليقين طهارة قلبك هي اللي بتخلي الروح خفيفة ومقبلة على الله.

العمل الصالح

كل ما عملت صالحاً وتقربت لله بالخفاء، كل ما زاد رصيد الأمان في قلبك، فتقف بين إيد ربنا وأنت حاسس إنه قريب منك وبيسمعك {إِلَيْهِ يَصْعَدُ الْكَلِمُ الطَّيِّبُ وَالْعَمَلُ الصَّالِحُ يَرْفَعُهُ}.

قبل ما تشتكي من تأخر الإجابة فتش في قلبك هل أنت داخل تدعي وأنت واثق في نصر ربنا؟ ولا داخل مهزوم وشاكك؟

طهّر قلبك وقدم عملاً صالحاً وارفع إيدك بقلب واثق حد السماء إن الله حيي كريم يستحي أن يرد يديك صفراً ساعتها بس، هتشوف المعجزات بتتحقق قدام عينك

والسلام عليكم ورحمه الله وبركاته