السلام عليكم,  
اخوان اني بيوم من الايام جنت طالب مثلكم بالسادس اعدادي وحالي حال هواي طلاب للاسف ماتوفقت بدرجتي ولا بوضعي طول السنه ... اكو مشاكل عامه يمر بيها الطالب العراقي واكو مشاكل خاصه. عل عموم اكو شغلات الواحد مايدركها الا بعدين من يتخرج ويخلص السادس اعدادي واهم موضوع بيها هوه الدراسة ... هسه بغض النظر عن سوء التعليم وفكرة حصر ال12 سنه تعبها بسنه وحدة مصيرية بس الاريد احجي عنه هو انُ اني اليوم بعد 3 سنين من تخرجي شفت الويل بلجامعة ودراستها بس دائما اطلع واطلع بدرجات عالية عكس السادس اعدادي (اني طالب هندسة مرحلة ثالثة) فالموضوع شغله نفسية الطالب يقلق الاهل والمدرسين قلقانين وصاير السادس عبارة عن بعبع بينما اني بالمرحلة الثانية شفت مثلا تكاملات اصعب عشر مرات من السادس اعدادي خلاني اشوفه سهل من غير انٌ نظام دراستي الي هوه معتمد عليه اني كليا يعني دراسة ذاتية وبمساعدة الذكاء الاصطناعي الي ديشرحلي ويفهمني كلشي بالتفصيل الممل وينزل لمستواي ويخليني بأعلى مستوى ... فالي جاي اشوفه هسه ويمر بي طلاب السادس اعدادي هاي مبالغه وحالة استغلال من المدرسين وفخ طاح بي الطالب والاهل موضوع انٌ لازم الطالب يدخل خصوصي ومعاهد ويوتيوب والكتروني وعشرين ملزمة يعني فد هوسه كلش بشكل ماله داعي وهيه تكون نتيجة ضياع الطالب وهاي مشكلة عامه يعني بعيدا عن سوء حرص الطالب في حال مادرس هوه او سخت فهاي مشكلة خاصه بي هوه يتحمل نتيجتها. وزارة التربية لازم تخلي حد لهل موضوع ولازم تغيير جذري بالمنهج نعم بس هسه دام الوضع مثل ماهوه فلازم الطالب يدرك انٌ الهدف من التعليم حتى يتثقف ويتعلم ويتوجه نحو شغفه وطموحه حتى يكدر يدرس ويحقق الي يريده وحتى لو تبحث عن معدل ال100 فأهم شغله تخليها براسك انٌ السادس اعدادي مو اكثر من مرحلة عادية جدا ودراستها سهله لو تتركون الموبايلات والملهيات وتتفرغون تقوون اساسكم وتدرسون عدل وبفهم قبل الحفظ وبالجامعة عرفت اهم شغله حتى تستفيد اقصى استفادة انٌ تعرف شنو تطبيق الشي الي تدرسه وشنو كدر العلم يصنع منه ... فهسه انتم كطلاب انصحكم تعتمدون الذكاء الاصطناعي الى جانب الدراسة الذاتية والي اوكي تكدر تجيب بيها ملزمة اسئلة واجوبة مال اي استاذ بس مايحتاج واحد يشرحلك وتضيع وقت اذا جنت تكدر تستعمل الذكاء الاصطناعي الي اذا كلتله مافهمت 100 مره فراح يشرحلك ب100 طريقة لحد ماتفهم وبعد ابد ابد ماتنساها وحتى المسائل هم لتضيعون وقتكم ويه استاذ يضل يعيدلكم نفس الطريقة او انته تعيد الفيديو مالته عشر مرات وعبالك المره ال11 راح تفهم بيها. حاول تفكر بمنطق وتنستنتج وتحل بنفسك وخلي الذكاء الاصطناعي يساعدك حتى هيج كلشي تكدر تحله وكلشي تكدر تفهمه وماكو سؤال يصعب عليك. وحتى لو جنت داخل الكتروني او معهد فمو غلط اذا كدرت تنظم وقتك وتدرس عدل وبهدوء بس لتخلي نفسك تنضغط لان عدو الطالب الاول هي الضغوطات الي تتجمع عليه مابين ضغط الدراسة والاساتذة الي كل واحد عباله بس هوه يدرسك ولا كأنو عندك مدرسين ودراسة ثانية وبين ضغوط الاهل عليك وبين المشاكل الشخصية وبالتالي تنفجر وبعد متتحمل وتمر بكسل واكتئاب وتوصل بيك مرحلة دراستك تصير قليلة كلش باليوم او يمكن حتى تترك وتبطل دراسة وتأجل او تعيد السنه ...

تأثير القلق النفسي على طلاب السادس اعدادي