انا و انتوا، احنا عندنا مشاكل مختلفه، انا ممكن احللكم مشاكلكم، و انتوا تحللولى مشاكلى لما تتحل مشاكلكم

حاسس ان مشاكلى سهله عليكم، و مشاكلكم سهله عليا، هو انا متاكد من التانيه، بس الاولى الله اعلم، لكن على الاقل هتكونوا مركزين معايا شويه لما تفضوا دماغكم

انا كنت و ما زلت بعلم نفسى فن التواضع، او الخضوع، و هنا دا مش تقليل من نفسى،

خلينى افهمك، معظم مشاكلكم تتحل لو شديتوا جلدكم شويه، لو رميتوا العنجهيه و الكبر شويه، و الكبر بيأتى على هيئة واحد نفسه يرد على حد تانى مضايقه، واحد عايز يرد الشتيمه، عايز يرد الاهانه، عايز ينتقم.

واحد مش عايز حد ينصحه، واحد مش عايز حد ينتقده و يقوله انت غلطان

واحد بيكره ابوه او امه عشان كل يوم بيبصوله و يعاملوه بطريقه دونيه جدا

كلها حاجات مفهومه، بس ما تجرب كدا تبطل اصلا شعور الكبر؟ رغبتك فى الرد ناتجه عن الكبر، فقط لا غير، اقعد قول ربنا يهديهم و سيبهم.

الى واخد عنك فكره غلط سيبه، الى بيتكلم عنك فى ضهرك وحش سيبه، الى شتمك فى وشك سيبه، ابوك و امك يؤذوك قل لهم شكرا و سيبهم، حد نصحك على النت طلع الحلو من النصيحه و سيبه لو معجبتكش، حد شتمك على النت سيبه، حد بتحاول تقنعه بحاجه مقتنعش سيبه.

عملت بوست رانت و حد جه لعن سلسفين ابوك، سيبه.

سيبه ياسطا

تخن جلدك ياسطا

خليك بنى ادم ياسطا

عيب اما كلمه تهزك و توديك و تجيبك

كلامى لل"ولاد" و البنات، لأى بنى ادم سهل و دماغه سهله، و كلامى صعب، و انا اخدت وقت و مجهود كبير عقبال ما دربت نفسى على دا، و لسه شويه كمان فاضلين.