مدرس سادي قعد يحكيلي أذاي كان بيعذب الطلاب و أنا في ستة إبتدائي

كان عندنا مدرس إسمه مستر رضا في إبتدائي و كان دخلنا حصة إحتياطي في يوم و قعد يحكيلنا أحنا الولاد (البنات كانوا في الإقتصاد المنزلي) أن الولاد ماعدوش بيحترموا مدرسينهم ذي الأول و قاعد يقولي عشان أنا كنت قاعد في الديسك الأول " أنت عارف ؟ أنا كنت بأوقف العيال صف بره الفصل و أخليهم يقلعوا الجزمة و الشراب و أخليه ينام علي الأرض في الحتة ديه كده -و شاور علي الأرض الي قدام باب الفصل- و أنزل علي رجله ضرب ماكنش يقدر يسحب رجله لأنه عارف أن أنا بعمل كده عشان مصلحته وكان العيل من دول يقعد يصرخ علي آخره و المدرسة كلها تسمع الصريخ فيعرفوا أن أستاذ رضا بيأدي واجبه و كان أبو العيل من دول يجي يأخد أبنه مضروب يبوس أيدي و يقولي متشكرين أنت تكسر و أحنا نجبس يا باشا " بعد كده قالي " بس عارف أنا لما أقابل واحد من الولاد دول في الشاعر بيقول لي فاكر يا مستر ده أنت عملت فيه كذه كذه فبقاله أنا كنت بعمل كده عشان مصلحتك متزعلش مني أنت حبيبي" و كان وقتها كان في صفر تسامح مع الضرب في المدارس و الي كان بيشيل عصايا من المدرسين كان بيشيلها عياقة كده و خلاص و هو قعد يعبر قد أيه الموضوع ده كان مضايقه و أن العيال مابقتش بتحترم المدرسين بعديها و كل الحوار ده حصل و فيه إبتسامة عريضة مرسومه علي وشه و حماس رهيب

و أنا و العيال التانين كنا بنحاول نقعه أن العيال أكيد شيالين منه و مستحيل يعمل كده و يحبوه و أنا قولت له أن أي مدرس ضربني قبل كده كرهته فهو قال " لا والله زمان كانوا الأهالي بيشدوا مع المدرس علي العيل دلوقتي بقوا بيدلعوكم و يقولك لا اصل أنا إبني مينضربش (بسخرية) " تقريبآ كان بيلمح علي مشكلة و لي أمر جه عملها عشان ضرب إبنه و هما كانوا شادين علي الموضوع ده وقتها فحصلتوا مشاكل في شغله معرفش الموضوع ده كان حقيقي و لا كلام و خلاص بس أنا شفت أنه كان بيلمح.

المهم أنه مش بس سادي هي ساديته بتفصله عن الواقع كمان هو مش واخد باله أن الحاجة الوحيدة الي العيال دول فاكرينها له بعد السنين ديه كلها هي ضربه و إهانته ليهم ديه معناها أن الموضوع عامل لهم صدمة بس المجتمع الي حواليه و تطبيعه مع العنف هو الي إداله الفرصة أن يمارس فكره السادي علي أجيال كاملة من الولاد .

بونس : هو كان ليه موقف سابق معايا أصلآ قبليها بسنة كنت بأكل فحصته أحتياطي برده قام مطلعني و قفت علي السبورة قام بعديها مقرب مني و مش عارف قالي أيه مردتش قام واخدني بدراع واحد و كان بيحاول يوقعني في الأرض بكل مجهوده كأننا في خناقة الذكرة ديه غريبة لأني فاكرها من منظور و كأني كنت قاعد بتفرج عليها بتحصل لحد تاني بس متأكد أنها حصلت لي