كتم حب لمدة 10 سنوات والوصول لمرحلة عدم التحمل

السلام عليكم

أبي آخذ رأيكم لأني وصلت لمرحلة فعلًا ما عاد عرفت وش الصح.

أنا محدثكم، عمري 20 سنة، طالب هندسة في جامعة البترول، بالسنة الرابعة. ومن سنوات وأنا أحب بنت عمتي، ومو حب طلع فجأة، بالعكس… كبرنا مع بعض من يوم إحنا أطفال، والعائلتين قريبين من بعض بشكل مو طبيعي. ندخل بيوت بعض بأي وقت، وطلعاتنا مع بعض، وتربينا كأننا إخوان وأكثر. لدرجة إلى اليوم هي عادي تكون موجودة قدامي بدون غطاء لأنها تعتبرني من أهل البيت.

المشكلة أني كتمت هالشعور قرابة عشر سنوات. كل مرة أقول: “مو وقته”، وبعدها: “إذا تخرجت”، وبعدها: “إحنا للحين صغار، وإذا تكلمت يمكن يتغير كل شيء بين العائلتين”. وكل مرة ألقى سبب يأجلني.

لكن الفترة الأخيرة الموضوع بدأ يأثر علي بشكل كبير.

معدلي في الجامعة نزل بشكل واضح (من 3.2 إلى 2.05)، وخسرت وزن كثير، وصرت قليل كلام مع الناس، مع إني قبل كنت إنسان اجتماعي وابتسامتي ما تفارقني حتى في أصعب الظروف. نومي صار سيئ، وكل تفكيري صار يدور حول هالموضوع، وحاس إني عالق بين خيارين، وكل واحد أصعب من الثاني.

أكثر ثلاثة أشياء تخوفني:

إنها تنخطب لشخص ثاني وأنا ما قلت ولا كلمة، وأعيش بقية
عمري ألوم نفسي لأني حتى ما حاولت.

الرفض، وهذا شيء طبيعي وممكن يصير.

وإذا تكلمت، يتغير شيء بين العائلتين أو تصير حساسية وإحراج.

أنا ما أبي علاقة، ولا تواصل خارج إطار الزواج، ولا أفكر إلا بالطريق الرسمي.

اللي أفكر أسويه هو إني أكلم أمها (عمتي)، وأقول لها بكل احترام إني أحب بنتها، وإن نيتي الزواج منها، لكني أحتاج وقت قبل ما أتقدم رسميًا بسبب ظروفي الحالية. ما أبي أحد يسبقني وأنا ساكت، وما أبي أوعد بشيء ما أقدر أوفي فيه الآن، لكن بنفس الوقت أبي أوصل لهم إن نيتي موجودة من الآن. بصراحة، هذي هي الفكرة اللي شاغلة بالي أكثر من أي شيء.

أنا قلت لأختي عن مشاعري، وكنت أتوقع مجرد الكلام بيخفف اللي في داخلي، لكنه ما غيّر شيء. بالعكس، صرت أحس إن اللي ممكن يريحني فعلًا هو إني أكلم شخص له علاقة مباشرة بالموضوع، وأقرب شخص أشوفه مناسب هو أمها. بحكم معرفتها فيني من عمري كله، وثقتها الكبيرة فيني، وأعرف إنها تعرف أخلاقي وشخصيتي أكثر من أي أحد.

فيه نقطة مهمة يمكن تفرق في الحكم على الموقف: أنا بطبيعتي كتوم جدًا وهادئ، وأي كلمة تطلع مني نادرة، لذلك لو تكلمت، اللي يعرفني بيأخذ كلامي بمنتهى الجدية.

وبرضه أوضح شيء مهم: بنت عمتي إلى اليوم ما تدري أني أحبها، ولا مرة لمحّت لها أو قلت لها أي شيء، واحترامها عندي أكبر من حبي لها. وعمري ما حاولت أستغل قربنا أو طبيعة علاقتنا العائلية بأي طريقة.

سؤالي لكم بكل واقعية:

هل تشوفون إني أكلم أمها من الآن وأوضح لها نيتي، مع إني أحتاج وقت قبل التقدم الرسمي؟ أو الأفضل أسكت لين أكون جاهز 100%، حتى لو فيه احتمال إنها تنخطب قبلها؟

أبي آراء صريحة، سواء كانت مع أو ضد، لكن بعيدًا عن التنظير أو الكلام المثالي. أبي أسمع من ناس تحاول تحط نفسها مكاني وتفكر بالموضوع بشكل واقعي.