تجربتي مع ال special interest او الاهتمام الخاص (نسخة طيف توحد)

اهلا وسهلا! في البدايه وش هي السبيشال انترست او بالعربي الاهتمام الخاص؟ هو من اسمه اهتمام مكثف بشيء معين لفترات طويله. هي من سمات طيف التوحد لكن!!!! والف خط على لكن، مو كل شخص عنده سبيشل انترست يكون توحدي، راح اشرحها اليوم من وجهة نظر طيف توحد

يوم كنت صغير كنت مهتم بفناف بيندي والعاب الرعب، كنت مهتم بطائر الكيوي والاوركا والحيوانات الموجوده في غابة الامازون (ما امزح اجلس اتفرج على حيوانات وحشرات الامازون فقط)، كمان اهتم بفنانين ووو... اللون الازرق، بشكل مجنون، كنت اعرف اصغر معلومه عن اي شي منهم

بالنسبه لي هذي الاهتمامات كانت كلللل حياتي وراحتي والشي الي يخليني مبسوط واحس بالسعاده منجد، لكن الي كان غريب هو قد ايش انا ممكن اصير جوا فقاعه واجلس ابحث بالساعات عن اوركا يؤدي عرض او حيوانات غابات الامازون لمدة ساعه، كمان اللون الازرق ما كان بس مجرد لون والسلام عليكم كان حرفيا كل حياتي، انا الحين لابس ازرق وماعندي ملابس مو زرقاء الا قليل، لون مفرش سريري، لون خلفية جوالي وايبادي، كنبتي، الديكورات! واكثر طبعا، كللل شي حولي ومريح لي لونه ازرق، انجذب لهذا اللون بدون لا احس كأني منوم مغناطيسيا، ليه انا كذا؟

طبعا محد كان يعرف اني توحدي ولا احد يفهم ليه ممكن اجلس العب لعبه وحده ٧ ساعات واكثر كأني اعيش جوا هذي اللعبه ولو كانت الشخصيات تتكلم حرفيا باجلس اعيد كلامها كانها تتكلم لي او انها صديقتي، ليه ممكن اجلس اجمع اشياء زرقاء حتى لو ما احتاجها، ليه ممكن اسولف لشخص ١٠٠ معلومه في دقيقه عن اغاني فناني المفضل ومعلومات عنه حتى وين كان يدرس

كبرت والناس بدو يحسون اني طفولي شوي وانا بديت احس ان خلاص يا اوركا استحي على وجهك صرت شايب وانت باقي تحب هالاشياء الطفوليه؟ بديت اصير اهتم في اشياء ثانيه الناس يحبونها وانا اقلدهم (masking) لين حسيت اني غير مرتاح ومنقرف في حياتي وناسي اساسا مين انا في الواقع.. زي ما يقولون، dont forget your roots، يوم تركت الناس ولا اهتميت لرأيهم عن قد ايش انا طفولي رجعت منتعش ومبسوط ومزاجي عالي العال ولله الحمد ومرتاح البال لابعد درجه، كأني مبتعث رجع لأهله اقسم بالله انه نفس الشعور

سواء كنت توحدي او لا، اهتم بالي يعجبك ولا تهتم لكلام الناس، اجلس تفرج في حيوانات غابات الأمازون بالساعات، اجلس جمع فيقرز وبلشز بيندي وفناف، اجلس حول بيتك للون الازرق كأنك باربي نسخه زرقاء، اهم شي انك مرتاح