فرعون و الكارتون

كارتون الأطفال خلاك تقتنع

إن فرعون كان شرير عبيط مكشّر دايمًا..

ماسك كرباج بيجلد بيه العبيد..

وبيصحى من النوم يزعق

ويقول {أنا ربكم الأعلى}

صح كدا؟

بالعكس ده كان أعظم وأنجح

(صانع وعي) في العالم القديم

عبقري في علم النفس

وأستاذ في الهندسة الاجتماعية

وتوجيه الجماهير!

قدر يدير منظومة معقدة..

ويقنع ملايين إنهم يتنازلوا عن حريتهم ويشتغلوا سُخْرة وهم مقتنعين إنهم كده عايشين في قمة التطور والوطنية!

عشان كده القرآن كرر قصته أكتر من أي حد تاني..

القرآن مبيحكيش قصة فرعون مات وغرق وانتهينا..

القرآن بيقدملك (الكتالوج) العبقري اللي بتمشي عليه أي منظومة استعباد وتغييب وعي..

سواء كانت:

- نظام رأسمالي متوحش

- إمبراطورية سياسية

- أو حتى سيستم اجتماعي بيسرق عمرك ويطحنك!

تعالى نفكك الكتالوج ده ونشوفه بيشتغل إزاي النهاردة:

١ـ (الاستقطاب):

﴿إِنَّ فِرْعَوْنَ عَلَا فِي الْأَرْضِ وَجَعَلَ أَهْلَهَا شِيَعًا﴾

يعني بيقسم المجتمع:

طبقة منتفعة قريبة من السلطة أو المال

وطبقة تانية مطحونة

ويخلي الناس تنهش في بعضها وتعيش في صراعات جانبية..

عشان يضمن إن المنظومة من فوق تفضل مستقرة وكلهم شغالين عندها.

٢ـ لما بيظهر صوت حق يهدده

بيلجأ لأقوى سلاح عرفته البشرية: (السَحَرة).. اللي هما الإعلام وصناع التريند والميديا النهاردة!

عشان يعملوا (Show) مبهر يغتالوا بيه الفكرة نفسها..

ويقلبوا الحق باطل بوهم بصري يغيب العقول.

٣ـ لما النظام يحس إن وعي الناس ممكن يصحى..

بيلعب على فزاعة مفيش إنسان بيقدر يقاومها:

(التهديد بلقمة العيش وتدمير استقرارهم).

وقف فرعون يقول للناس:

﴿يُرِيدَانِ أَن يُخْرِجَاكُم مِّنْ أَرْضِكُم بِسِحْرِهِمَا وَيَذْهَبَا بِطَرِيقَتِكُمُ الْمُثْلَىٰ﴾

يعني بيقولهم بمنطق النهاردة:

الناس دي جاية تخرب بيوتكم

وتضرب استقراركم

وتدمر (طريقتكم المثلى) اللي هي أسلوب حياتكم وحضارتكم!

٥ـ وهنا بتحصل الكارثة الأكبر..

بينجح فرعون في أعظم عملية (هندسة اجتماعية) في التاريخ..

القرآن لخصها في آية واحدة مرعبة بتشرح إزاي بيُصنع العبيد:

﴿فَاسْتَخَفَّ قَوْمَهُ فَأَطَاعُوهُ﴾

النظام نجح يسلب عقولهم لدرجة إن المطحون بقى يدافع عن المنظومة اللي بتستعبده..

وهو مقتنع من جواه إنه كده بيدافع عن نفسه!

٦ـ وهنا بقى بتيجي اللمسة اللي العقل المادي مبيفهمهاش..

كلمة (أنا ربكم الأعلى) مكنتش مجرد ادعاء ألوهية في السما.. دي كانت إعلان بـ (احتكار الأسباب).

فرعون كان بيقولهم أنا اللي بأكلكم

وأنا اللي بأمنكم

ومستقبلكم ورزقكم في إيدي أنا!

ودي بالظبط نفس الرسالة اللي بيبعتهالك أي سيستم مالي عالمي النهاردة..

بيخوفك من بكرة

ويغرقك في الاستهلاك

ويوهمك إن رزقك وأمانك مرهون برضاه عنك!

طول ما قلبك متعلق بالأسباب وخايف على رزقك.. إنت لسا في قبضة فرعون!

بالمناسبة

العبودية ماتلغتش زي ما إنت فاكر..

اه الكرباج والسلاسل اختفوا..

لكن حل مكانهم (خوف على بكرة) و(تعلق مرضي بالدنيا) بيخليك تسجد للسيستم من غير ما تحس.

والحرية الحقيقية هي (عتق القلب)..

بإنك متشوفش في الكون مالك ولا رازق ولا مدبر إلا ربنا.