الاماكن العامة والستر

ملحوظة: اسف على الاطالة بس الموضوع انا شايفه مهم جدا

معلش يجماعة انا فيه موضوع بجد شاغل بالي من فترة وحاسس انه خرج عن السيطرة حبتين تلاتة اربعة

دلوقتي فيه ظاهرة بجد مقرفة وغريبة وبقت مقبولة اجتماعيا من فئات معينة وهي ان الناس بقت تستبيح الطرق والاماكن العامة علشان لعمل افعال فاضحة (سواء الفعل من طرفين او طرف واحد) او تعري او غيره وبجد حاسس الموضوع بقى فيه بجاحة وخرج عن السيطرة

انا يجماعة مش بقول ان كل البشر ملايكة وان الناس مبتغلطش بس معلش بجد يجماعة هو ده ازاي ميعتبرش تحرش بالمارة اللي في الطريق او الناس اللي ساكنة في الشارع الجانبي اللي انت واقف فيه، مين اداك الحق والconsent اني انا او امي او اختي او عيلتي كلها موافقين نشوف اعضائك الجنسية سواء انت لوحدك او معاك شريك تاني، ولو ده ميعتبرش تحرش بيا واعتداء على مساحتي الشخصية فإيه تعريف التحرش بالنسبالكم بجد؟؟

لحد هنا وممكن نقول ان ده شئ مش جديد وكان موجود زمان بس النت طلعه للعلن وكدة (مش متفق بصراحة)، ولكن اللي حرفيا خلاني في حالة حيرة شديدة اني زي اي مواطن اصيل متابع صفحة وزارة الداخلية وبصراحة بشوف الصفحة دي مادة للسخرية اصلا ومش بركز معاها اوي

بس امبارح لقيتهم منزلين ڤيديو لإتنين اتقبض عليهم علشان بيمارسوا فعل فاضح في عربية في منطقة فيها اضاءة عالية جدا وقدام كاميرا مراقبة بالظبط يعني اكيد كانوا واقفين قدام محل مثلا ولحد هنا انا قولت لا حول ولا قوة الا بالله وكنت هتجاهل وهقلب للبوست اللي بعده وخلاص، بس للأسف ايدي راحت على الكومنتات واتفاجئت هناك بكمية الكومنتات اللي بتشتم بأقذر الالفاظ وبتدعي بأسوأ الدعاوي على الشخص اللي سرب الڤيديو من كاميرا مراقبته لدرجة اني شوفت كومنت لست عجوزة بتقول (وانا هقتبس الكومنت منها بالظبط):

"بإذن الله ربنا هيبتلي اللي سرب الڤيديو بذنب ميتوبش منه ابدا وبعد كدة يفضحه بيه في وسط اهله واولاده"

وهنا بصراحة انا حسيت اني مش فاهم حاجة... يجماعة انا متفهم ان الستر واجب على كل مسلم ولكن احنا بنتكلم عن ناس واقفة في مكان عام وقدام بيوت وفيه اطفال ممكن تشوف المنظر ده؟؟؟ هل الستر في الحالة دي بينطبق على الناس اللي محاولتش بأقل الدرجات انها تواري نفسها وهي بتعمل الذنب علشان نقول اننا نستر عليهم يمكن يتوبوا

انا متفهم ان حتى اللي بيعملوا كدة ممكن يتوبوا بس كام واحد هيتوب قصاد كام واحد هيتجرأ انه يعمل كدة اكتر؟ وهل فعلا الشخص اللي بيعمل كدة ومش بيحاول يداري نفسه مش فاهم انه اسوأ من اسوأ متحرش؟

سؤالي هنا للناس وأسف على الاطالة، هل من الصح دينيا نستر على الناس دي يمكن المجتمع يتصلح لوحده ولا الصح اننا نحاول نحجم الموضوع قدر استطاعتنا عن طريق اننا بس نبلغ الجهات القانونية باللي حصل

وملحوكة اخيرة انا مش بدعم ان الڤيديوهات دي تنتشر على النت بس رأيي البسيط ان اللي صور يروح يبلغ من سكات بالڤيديو وبعد كدة يمسحه من عنده خالص