رفاهية الـ anonmity

المشكلة إني لما بكتب عن حاجة هنا مضايقاني، بحس إني عايز كل حاجة تكون مفهومة باعتبار إن المساحة دي تعتبر كأنها يوميات خاصة بيا، بس الفرق إن فيه ناس تقدر تقراها من غير ما تعرف دي يوميات مين، ومش علشان كدا الناس زمان كانت بتكتب يوميات؟ إنها عايزة في يوم من الأيام حد يطلع على الأسرار دي سواء بعد موتهم أو بشكل تلصصي في حياتهم؟ عندهم رغبة مكبوتة ممكن مايكونوش واعيين بيها إن دواخلهم اللي مابيشاركوهاش مع حد تتفضح؟

مع ذلك المشكلة بتفضل إني بحس إن كل الباكجراوند لازم يكون مفهوم، فبحس إن فيه حاجات كتيرة محتاجة تتشرح، وبحس دا مجهود في حد ذاته ضخم

يعني أنا من صغري عمري ما فهمت فكرت إن الفضفضة والكلام بتريح، انت لما بتتكلم عن حاجة مضايقاك، لازم ترتب الموقف في دماغك، وتحوله وترتبه بحيث يترجم على هيئة كلام وأحداث بتسلسلها الزمني المنطقي، وبعدين تشوف إيه الطريقة اللي قدامك هيقدر يفهم بيها اللي بتقوله، والموضوع بينتهي إنك بتسترجع كل اللي مضايقك من أول وجديد بصور واضحة وجرافيك كأنك بتعيش المواقف كلها من أول وجديد وبتحس بنفس الآلام من تاني، إيه المريح في دا؟