بدأت وأنا 10 سنين لما اشتريت رقعة بـ 200 جنيه وبدأت أنا وأخويا نلعب وخلاص من غير ما نكون فاهمين القواعد صح.. مع الوقت وكل ما نكبر نفهم قاعدة جديدة، لحد ما قررت آخد الموضوع بجدية من 2024.

الشطرنج مش مجرد نقل قطع.. لما بكون قدام حد ثقيل ومفيش حد فينا بيغلط، التركيز بيكون في السما، وبحس بإثارة ومتعة ونشوة مش طبيعية لما أكسب

الإيجابيات:

بتعلمك تفكر: أهم حاجة طلعت بيها إنها علمتني أهدى وما آخدش قرار أو أحرك قطعة غير لما أحسب تبعاتها الأول.

فرحة الفوز: لما تكسب جيم طالع عينك فيه بتحس بفرحة ملهاش حل.(للي مش لاقيين الفرحة)

لعبة عادلة بتكافئ اللي بيحلل وبيصبر.

السلبيات:

سراقة وقت: الساعات بتطير فيها من غير ما تحس

ملل الافتتاحيات: مذاكرة الـ Openings مملة جداً. بس ممكن تتعلمها من موقع lichess علي هيئة الغاز.

حرق أعصاب: الخسارة بسب غلطة غبية في الآخر ممكن تقفل يومك.. (واسمع مني إنك تضرب الجدار وإيدك توجعك احسن من إنك ترمي التليفون تكسره)

الصعوبة:

تتعلم حركات القطع في يوم، لكن احترافها؟ جنووني، محتاجة طول بال مش طبيعي، ممكن تقعد 10 سنين بتلعب وتدرس و برضو تكتشف إنك لسه بعيد عن القمة.

تقييمي النهائي: الشطرنج الي يقيمني✋

لو بتحب التفكير واللعب الذكي وبتحس بمتعة وأنت بتشغل دماغك.. العبها علي ضمانتي لكن لو معندكش صبر وعاوز حاجة تحترفها بسرعة وسهولة، ابعد عنها لأنها هتجيبلك إحباط.

تقييمي وتجربتي مع الشطرنج من رقعة بـ 200 جنيه