> മുന്നൊരുക്കങ്ങൾ നടത്തുന്നതിന് മുൻപേ പ്രളയം എത്തി എന്ന വിചിത്രമായ ന്യായമാണ് മുഖ്യമന്ത്രി ദുരന്ത നിവാരണത്തിലെ പാളിച്ചകൾക്ക് മറുപടിയായി നൽകുന്നത്. പമ്പ ഉൾപ്പെടെയുള്ള നദികളിൽ നീരൊഴുക്ക് തടസ്സപ്പെട്ടതാണ് ജലനിരപ്പ് ഉയരാൻ കാരണം എന്നാണ് മുഖ്യമന്ത്രി പറയുന്നത്. നദികളിലെ മണ്ണുമാറ്റാൻ ഇനി മുൻഗണന നൽകും എന്നും അദ്ദേഹം ഇന്ന് പത്തനംതിട്ടയിൽ പറയുകയുണ്ടായി. എന്നാൽ ഈ പറയുന്ന അദ്ദേഹത്തിന്റെ പാർട്ടി തന്നെയാണ് മുൻപ് പമ്പാനദിയിലെ പ്രളയസാധ്യത കുറയ്ക്കുന്നതിനായി മുൻ എൽ.ഡി.എഫ് സർക്കാർ നടപ്പിലാക്കിയ മണൽ നീക്കൽ പദ്ധതിയെ രാഷ്ട്രീയ ലക്ഷ്യങ്ങളോടെ അട്ടിമറിച്ചത്.   
   
> 2018-ലെ മഹാപ്രളയത്തിന് ശേഷം പമ്പാ-ത്രിവേണി മേഖലയിൽ അടിഞ്ഞുകൂടിയ ചെളിയും എക്കലും നീക്കം ചെയ്യാൻ സർക്കാർ തീരുമാനിച്ചപ്പോൾ, അതിൽ അഴിമതിയും നിയമലംഘനവും ആരോപിച്ച് പദ്ധതി തടസ്സപ്പെടുത്തിയത് അന്നത്തെ പ്രതിപക്ഷ നേതാവ് രമേശ് ചെന്നിത്തലയുടെ നേതൃത്വത്തിലായിരുന്നു.   
   
> പൊതുമേഖലാ സ്ഥാപനമായ കേരള ക്ലേയ്സ് ആൻഡ് സിറാമിക്സ് പ്രൊഡക്ട്സ് ലിമിറ്റഡിന് മണൽ വാരൽ ചുമതല നൽകിയതിൽ ക്രമക്കേടുണ്ടെന്ന് ആരോപിച്ച് രമേശ് ചെന്നിത്തല വിജിലൻസ് കോടതിയെ സമീപിക്കുകയായിരുന്നു. എന്നാൽ, ഈ ആരോപണങ്ങൾ അടിസ്ഥാനരഹിതമാണെന്ന് ചൂണ്ടിക്കാട്ടിയ കേരള ഹൈക്കോടതി പിന്നീട് വിജിലൻസ് അന്വേഷണം റദ്ദാക്കി. ദുരന്തനിവാരണ നിയമപ്രകാരം കളക്ടർ എടുത്ത ശരിയായ തീരുമാനമായിരുന്നു അതെന്നും അതിൽ ക്രമക്കേടുകൾ ഇല്ലെന്നും കോടതി നിരീക്ഷിച്ചതോടെ യു.ഡി.എഫിന്റെ അഴിമതി ആരോപണങ്ങൾ പൊളിയുകയായിരുന്നു.   
      
> യു.ഡി.എഫ് നേതാക്കൾക്കൊപ്പം ബി.ജെ.പി മുൻ സംസ്ഥാന പ്രസിഡന്റ് കുമ്മനം രാജശേഖരനും ചേർന്ന് ഹരിത ട്രിബ്യൂണലിനെയും ഹൈക്കോടതിയെയും സമീപിച്ച് പദ്ധതി തടസ്സപ്പെടുത്താൻ ശ്രമിച്ചു. പ്രളയസാധ്യത ഒഴിവാക്കാൻ നദിയിലെ എക്കൽ നീക്കം ചെയ്യേണ്ടത് അനിവാര്യമാണെന്ന് ഹരിത ട്രിബ്യൂണൽ നിലപാടെടുത്തിട്ടും, പരിസ്ഥിതിയുടെ പേരുപറഞ്ഞ് പ്രതിപക്ഷം തടസ്സവാദങ്ങൾ തുടരുകയായിരുന്നു.   
   
> പ്രതിപക്ഷത്തിന്റെ ശക്തമായ എതിർപ്പിനെത്തുടർന്ന് വനംവകുപ്പ് മണൽ പുറത്തേക്ക് കടത്തുന്നത് തടഞ്ഞതോടെ, വാരിക്കൂട്ടിയ മണലും ചെളിയും നദീതീരത്ത് തന്നെ സൂക്ഷിക്കേണ്ടി വന്നു. ഇത് പമ്പയിൽ വീണ്ടും വലിയൊരു പ്രളയത്തിന് വഴിമരുന്നിട്ടിരിക്കുകയാണ്. വി ഡി സതീശൻ ഇപ്പോൾ പറഞ്ഞതുപോലെ എക്കലും മണ്ണും അടിഞ്ഞുകൂടിയാണ് പ്രളയം ഉണ്ടായതെങ്കിൽ അതിന്റെ ഉത്തരവാദിത്വം യുഡിഎഫും ബിജെപിയും ഏറ്റെടുക്കണം.