اعجبت بواحد في المواصلات اول مره اشوفه بس مش عارفه دا اعجاب به ولا بالموقف

النهارده الميكروباص كان بيحمل وفيه ست قاعده هي واتنين ولادها في كرسيين وممشيه حالها عشان الاجره غاليه و باين عليها مش هتقدر تشيل التلات كراسي المهم جيت واحده مليانه اوي ( مش بتريق بس عشان تتخيلوا) قعدت جمبها فمكانتش عارفه تقعد فمسكت في الست وقعدت تقولها ليه متخديش التلات كراسي وقعدت تزعق وبصراحه كانت مستفزه اوي والست كان باين عليها أن دمها اتحرق لحد ما فيه شاب قال للست اللي مليانه انت عندك ولاد قالتله اه عندي اتنين قالها وانت لسه سايبهم جوه ليه العربيه كلها قعدت تضحك عليها والست وعيالها معانا والست التانيه معدتش طلعت صوت اللي هو بلعت لسانها اللي عجبني بقي في الشاب ان لما العربيه طلعت وفي نص السكه كده لقيته بيكلم الست المليانه بيعتذر لها وانو عمرو ما زعل حد قبل كده وان هي كانت مستفزه اوي المره فجأه لقيناها دمعت وقعدت تقوله انت مش محترم وهو يقولها انا عارف وانا اسف وحقك عليا وبصراحه مع انها غلطانه بس صعبت علينا كلنا وقعد يقولها خلاص انا اسف والله لحد ما في الاخر هدت وقالت خلاص انا فعلا كنت غلطانه واعتذرت للست وعيالها بعدها بدقيقتين لقيت الشاب بيطلع من جيبه شوكولاته و قالها اتفضلي عشان العيال تتغذي بهزار كده قعدت تضحك وخدتها وقعدوا يتكلموا طول الطريق

الموضوع اللي عجبني بقي أن هو اولا جاب حق الست اي نعم بطريقه غلط بس جابه ورجع اعتذر للست التانيه اللي هو عارف انو زودها بصراحه كان موقف جميل واتمني يكون في ناس كتير كده