للاسف يا فندم لازم تيجي الفرع تحدث البيانات. طب انا عايش برا؟
معاناة و كلاحة مع البنوك المصرية و"السيستم" اللي يا إما مقفول فشخ، يا إما مفتوح عالاخر ومحدش فاهم بيحصل فيه إيه 😂
لو انت عايش برا مصر و فاتح حساب في بنك مصري (آه بنحتاج نفتح حساب عشان عندنا شغل في مصر وبنحتاج نحول مبالغ من برا)، فأنت بنسبة 100% غالبًا هيحصلك اللي حصل معايا.
- فجأة كده، تلاقي نفسك مش عارف تحول فلوس من حسابك، لا عن طريق تحويل بنكي ولا InstaPay، عشان لازم "تحدث البيانات".
طب أنا مفيش حاجة اتغيرت في بياناتي؟؟؟
معلش يا فندم، لازم تيجي الفرع وتمضي إن مفيش حاجة اتغيرت.
طب أنا عايش برا مصر، وبيني وبين مصر 11 ساعة طيران. أعمل إيه يعني؟
للأسف مفيش حل يا فندم 🥲
طب أروح القنصلية وأعمل توكيل عام أو خاص بنوك لحد من قرايبي يتعامل هو بدالي في الموضوع ده؟
لأ يا فندم، لازم حضرتك بنفسك تيجي، عشان لازم الإمضاء.
طيب خلاص، مفيش مشكلة. هحدث البيانات لما أنزل مصر، ومش مشكلة، هوقف التحويلات الدولية للبنك لحد ما أرجع.
هوب اسكالوب 💨
الكارت الائتماني يقف.
إيه المشكلة بقى؟
أصل يا فندم، تم رفض عملية بنكية 3 مرات ورا بعض.
طيب ليه؟
عشان كنت بستخدم الـTap بدل ما أدخل الكارت في الماكينة.
آه، تمام... وبعدين؟
لا يا فندم، إحنا في البنك قدرنا القصة دي إن الكارت اتسرق، وإن حد بيحاول يستخدمه، فعملناله Block 🤡
طيب يا ستي أنا ابن 60 في 70، أنا آسف 😂 ممكن تفكولي الـBlock؟
تؤ تؤ.
لازم تزور الفرع وتمضي عشان نوقف الحظر.
ملحوظة: أنا عايش في كندا بقالي ١٢ سنة و قبليها عشت في فرنسا ٣ سنين و اتعاملت مع بنوك اشكال و الوان عمري ما شوفت "بيض" زي ساعة ما بتعامل مع بنوك مصرية و بالاخص البنوك الحكومية زي بنك مصر و الاهلي علشان اكون منصف
حتى لو انت عميل في اي بي في بنك مصر و عندك ودائع فوق ال١٠ مليون جنيه, موظف او سيستم غريب قادر يوقفلك كل المراكب السايرة و يلزمك تحجز تذكرة طيران لمصر فوق الالف و نص دولار علشان بس تروح الفرع و تمضي.
لله الامر و حسبي الله و نعم الوكيل
Posted Aug 11, 2026, 11:29 AM UTC