Letterboxd | شرح عن المنصة ومشاركة حسابات بعضنا

بما انو في شخصين سابقاً حاولو ينزلو بوست بهدف بحث عن اصدقاء على Letterboxd (شخصين يعني هاد يعد رقم كبير بالنسبة للساب هون يعني برياحة شي 48.6% من الأعضاء النشطة) فقررت اعمل بوست اداري لنتشارك مع بعضنا بشكل منظم اكتر

بأمكانكم تشاركو روابط حساباتكم بالتعليقات بشرط انو تحطو نبذة عن زوقكم بلأفلام على هل طريقة مثلاً:

رابط حسابي وبعض أفلامي المفضلة

https://boxd.it/lUKRR

• Sinners 

• Blade Runner 2049

• The Martian

• The Whale

• Sucker Punch

• Meet Me in St. Louis

• The Wizard of Oz

• Snow White

المخرجين المفضلين:

• Zack Snyder

• Denis Villeneuve

بتابع كلشي على حسب المزاج بس بحب بشكل خاص أفلام الـ Musical والـ Superhero والأفلام اللي عليها شغف انتاج عالي ونمط سينمائي غريب خارج نطاق التقاليد والمعتاد

---

حطو كمشة من 5 لـ 10 أفلام كحد أقصى (مو ضروري تحطو مخرجين مفضلين بس المهم الأفلام)

يا ريت بس اذا عنوان الفيلم في كلمات حساسة حطو بين Quotations وضيفو بعدو كلمة Movie متل مثلاً هيك:

• "Weapons" Movie

• "Over Your Dead Body" Movie

مشان ريديت يفهم سياق التعليق وما يفكرك عم تهاجم حدا او عم تحكي بمواضيع ممنوعة ونوقع بوجع راس

---

هلئ شرح سريع عن المنصة للناس اللي مو عندهم حساب وحابين يفوتو..

الـ Letterboxd هو منصة ممكن نعتبرها تدوين وتأريخ الأفلام اللي عم نشوفها او شفناها سابقاً أو متل كأنو منصة Social Media بس مخصصة للأفلام

فينك ببساطة تضيف فيلم على قائمة الأفلام اللي شفتها سابقاً بدون اضافة تاريخ المشاهدة تبعك وبأمكانك تحطلو Like و تقييم ببلش من نص نجمة لخمس نجوم وتحطلو مراجعة و Tags اذا حبيت

بس الأفضل مع الوقت انك تصير تعمل Log لكل فيلم مع تاريخ المشاهدة تبعك هيك حتى تنظم بروفايلك ويطلع حسابك ارتب

فينك تفكر بالـ Log انو كأنك عم تنزل بوست انك شفت الفيلم، وبصير بيظهر الـ Log تبعك بخانة الـ Diary مع المراجعة والتقييم تبعك (وطبعاً براحتك مو شرط تحط مراجعة وتقييم وفينك تعمل Edit للـ Log وتضيفهم بعدين مو مشكلة)

لما تجي تضيف Log حتشوف زر كمان مكتوب عليه First-time watch يعني لتوضيح انو هي أول مرة شفت الفيلم.. اذا كبست عليه بيقلب لـ Rewatch (يعني مو اول مرة بتشوف الفيلم) وفينك كل اسبوع تشوفو وتعملو Log مع زر الـ Rewatch عادي

الـ Tags هني أداة خيارية لترتيب الـ Diary (خانة الـ Logs أو "البوستات")

إلك حرية مطلقة تحط Tags من راسك وعكيفك مع استيعاب انهم اداة للجرد وترتيب الـ Logs تبعك (و هني أيضاً بكونو Public وكل مين بيفتح بروفايلك بشوفهم وبيقدر يفلتر قوائم أفلامك على أساسهم)

مثلاً اذا شفت فيلم مع رفقاتك فينك تحطلو تاغ watched-with-friends او مثلاً شفت فيلم بالسينما حطلو تاغ cinema

وهيك بصير مع الوقت فينك تعمل فلترة لخانة الـ Diary بشكل انو تظهرلك Logs فقط من اللي عليهم تاغ معين

و في شي اسمو "Lists" يعني قوائم بكمشة افلام معينة ممكن تكون قوائم رسمية و ممكن تكون من حساب مستخدم عشوائي وهني عبارة عن طريقة ظريفة لاكتشاف افلام من زوقك لأنو كمان بيمشي عليهن موضوع الـ Tags لسهولة العثور عليهم

فمثلاً فينك تكتب Horror movies بالبحث وبيطلعلك كلشي Lists عليهم تاغ الـ "Horror movies" ـ

وخانة الـ Watchlist ما بدها شرح.. هية خانة الأفلام اللي حابب تشوفها قريباً

وهاد كلشي محتاج تعرفو اذا كنت جديد على المنصة.. ومع الوقت بتتعود وبتاخد ايدك على كلشي

(انا بحد ذاتي اعتبر جديدة على المنصة فأذا شرحت شي غلط رجاءً صلحولي بالتعليقات)

---

في منصات تانية تقريباً نفس الفكرة والميزات تماماً بس لغير شغلات

• Goodreads / للكتب

• Serializd / للمسلسلات والأنمي

• Musicboard / للأغاني والموسيقا

ممكن نعمل بوست عنهم كمان بعدين اذا حبيتو بس حالياً رح نركز على Letterboxd بهاد البوست مشان لا نكركب المواضيع ببعضها