**أعتقد أننا على مشارف صحوة جديدة أبرز سماتها التناقض الفج اللي يقدر يميّزه الرضيع وأعتقد أيضًا أن سببها مواجهة مشروع أبوظبي - تل أبيب وانك لازم تظهر بمظهر حامي الامة ومبادئها**

**عودة زمنية بسيطة**: بعد ثورة إيران عام 79 ظهرت مفردة "الصحوة" لمواجهة المشروع الإيراني، وقبلها تمت مواجهة الناصرية بنفس الطريقة من خلال تبنّي المعارضة الإسلامية المصرية المتمثلة بالإخوان، فضلًا عن أننا كدولة مبنية على ميثاق ديني ثيوقراطي أصلًا.

 

ما علينا اللي فوق هذا مقدمة لتفسير متغيرات الوضع الحالي، واللي خلاني أتنبأ بصحوة جديدة لعلها القرارات الأخيرة وما قبلها برضو، لكن المهم هو القرارات الأخيرة وحجب مشاهير سناب (ما أتقبّلهم على الصعيد الشخصي بالمناسبة) بحجة الحشمة. المفارقة العجيبة أن علامات الصحوة الجديدة هي "أخلقة" السعوديين فقط، يعني منظومتنا المحافظة حقتنا تسري على من يحمل الجواز الأخضر فقط، لأنه بنفس الوقت اللي حُجبت فيه هند القحطاني بأمريكا، أنا قاعد أجيب عارضات أزياء بالمايوه بالعلا مثلًا، فضلًا عن الحفلات الغنائية اللي فيها كاردي بي بالرياض، وهيفاء وهبي نادي القولف؛ كل هذي الحالات تخليك أضحوكة وسط محيطك لأنك متناقض بشكل فج ومضحك وغير منطقي.

ويُحسب للصحوة السابقة أنها كانت تحرّم كل شيء بصرف النظر عن الجنسية (مع استثناء بسيط للأجانب في أرامكو وغيرها) **أما الصحوة الحالية فصريحة في التفريق**: بين كونك مواطن بنعاقبك ونحجب ظهورك وبين كونك أجنبي فيُباح لك ما هو محرّم على المواطن.

تميزت الصحوة السابقة بمظهر "مطوع" يركب جمس ويطارد الناس للصلاة ويحاسبهم على طقوسهم وعباداتهم وأخلاقياتهم ويسألهم "هذي وش تقرب لك"ولازم تقدّم مبررات وكرت عائلة يثبت صلة القرابة وغالبًا  معه مؤهل ثانوي ليلي وله سوابق أخلاقية ومخدرات وقرر يتطوع مع هيئة الأمر بالمعروف والنهي عن المنكر، ثم وظّفوه الصحوة الحالية مظهرها غالبًا أملط (هو نفسه كان مطوعًا أيام الصحوة السابقة، بس غيّر الستايل عشان يتسلق الموجة)، ويركب لوسيد ويشتغل في هيئة تنظيم الإعلام ومع بكالوريوس شريعه ومتخرج بدبلوم معهد القضاء، ويطارد حسابات سناب وتيك توك المراهقين بحجة الذوق العام اللي محد يعرف وش هو لانه مفهوم هلامي مطاطي

يهمك تعرف انه حتى تم تجريم "حقين الطاقة " والخرابيط الهرائية هذي اللي ما أتفق معها وبنفس الوقت أنا ضد تجريمها من باب "أنت حر طالما لم تضر" واللي يقدر يجرّم بشخطة قلم قادر على تجريمك لأنك تشرب كولا بدال البيبسي لأن الشغلة مزاج.

https://preview.redd.it/gvxjx8p336jh1.png?width=470&format=png&auto=webp&s=2a148339867a831aba66577522ad06a79ba59f3f

https://preview.redd.it/kop0zykg16jh1.png?width=424&format=png&auto=webp&s=554d2933467105f8b55c13e839ca13ee0c186ee3



ديجافو الصحوة