متساعدش الناس دول..

مبدأيا عارف اني هقول كلام صادم و مش هيعجب الكل، بس شوف كلامي للأخر و احكم

فيه ناس الفترة دي علي فيسبوك و تيك توك و وسائل التواصل طالعه تشحت و تصورلك البيت و يقولك تبرعات وبتباع، متديش الناس دي حاجه.

ليه؟ سببين اتنين بس

اول حاجه انت مينفعش تثق ب اي حد أونلاين انت متعرفش مين ورا الشاشة ده او مين بيتكلم يمكن يكون نصاب او مدمن و بيصرف الفلوس دي في حاجات غلط او يمكن بيسترزق من الشحاته علي قفه الناس الغلابه الي بيتبرعوله.

تاني حاجه و اهم سبب انه الناس دي بتاخد اعذار محرجة، الي يطلع يقولك انا يتيم (شخص بالغ كبير يقدر يشتغل!!) هل هو متوقع انه اهله هيصرفوا عليه؟ لا ده زعلان انهم مش موجودين يصرفوا عليه و هو راجل كبير كدا و مش محرج من نفسه!!، الناس الي انت بتشوفها علي وسائل التواصل دي معندهاش عذر، انت راجل و عاقل و لازم تشتغل علي نفسك و تصرف علي نفسك حتي لو شغلانه صغيرة لو انت فيك صحة فا عيب عليك تمد ايدك ل حد و لو عليك دين فا الدين ده انت الي عملته و انت الي تسده دي مسؤوليتك.

و طبعا الفلوس دي الاولي تروح ل اخواتنا في غزه او حتي تديها ل قرايبك الغلابه لكن بلاش ابدأ تنخدع بالمظاهر الي علي مواقع التواصل.