صارلي فترة متضايق من اخوي الصغير خصوصا هاي المرحلة مابين الطفولة والمراهقة بأعتباره داخل للمتوسطة فصاير كلش مزعج وغثيث وخبيث رغم هوه اخوي الصغير واحبه وصارلي فترة خلاني اشتاق هواي لنسخته القديمه من وهوه صغير عمره بين السنه للاربع سنوات هاي كلها تنكط كياته بيها بس شسوي كبر بعد والنوب يشكي لابوي مني على اقل شي ويخليني انكتل.  
  
المهم البارحة هوه انكتل من الاهل ومع انُ اني اتضايقت من شفته جاي ينبسط بس ماسويت شي وكلت طبه مرض خل يتربه ويضوك مثل الي اني جان يصير بيه ... بعدين بنفس اليوم بليل من نمت حلمت اخوي الصغير ميت واني جنت كلش متضايق منه ومنزعج وحاقد ومدري شلون ومدري منو خيرني خيارين يا اتقبل الواقع هذا واعيشه أو ترجع نسخته الصغيرة بعمر السنتين الكيوت الي احبها واتمناها ترجع بس اكو ضريبة وثمن وهيه انو تموت نسخته الحالية بعمر 12 واني انساها من بالي وكأنو ماجنت اعرفه من قبل ...

بالحلم اختاريت انُ انساه ويجي الجديد وفعلا كدام عيني مات واجت النسخه القديمة مالته وهوه صغير ماعنده اي وعي ولا خباثه بس بهل اثناء واثناء ما اني جاي تنمسح من بالي ذكرياتنه فجأة وعيت على نفسي واتندمت ندم شديد كلش وخلاني متضايق مو علمود شي بس لان فقدت اخوي الي عشت ويا 12 سنه ... 12 عام ذكريات بحلوها ومرها عشناها سوه وشفناها وشفته يكبر وشفته يصير (هوه شاطر) كله راح.

يعني اني حتى لو رجعلي طفل واعيش ويا من جديد بس منو يرجعلي ال12 سنه الي راحت؟   
اني اعرف انو أخوي اليوم عمره 12 سنة، والطفل اللي جان عمره سنتين انتهى وما راح يرجع. مهما تمنيت ما اكدر ارجع اعيش ذيج المرحلة ويا. والحلم انطاني نسخة منه بس ما انطاني ذكرياتي القديمة وذاك الوقت الي جانت الدنيا بي ابسط واني جنت صغير ماعندي مثل المسؤوليات هسه.  
لهذا مجرد وجوده كدامي بلحلم مو مفرح ابداً وتندمت لان اكتشفت الاخ الجديد ماراح يعوض الاخ الي فقدته...  
وقدملي سؤال هل اختار الماضي الجميل اذا جان الثمن محو الحاضر؟ وبعد ما اختاريت اكتشفت ان المواقف السيئة هي جزء من اي علاقه وهي الي تصنع للعلاقة قيمة لان ماكو شي بيرفكت

وبالنهاية هذا مجرد حلم والعقل يحب يدوس زايد ويسوي دراما ويخلي الواحد يتضايق. وهو طفل وماعندي شي ويا يكبر ويعقل واني اصلا بعيد عنه بالاسبوع اشوفه مره او مرتين لهذا اتأذى لمن اجي ويكون هيج تعامله وياي. وهم اني من النوع الي احلامي كلش غريبة وتأذي

حلم غريب خلاني اليوم كله متضايق