POV: لما يجيلك Panic attack فتقع في ميكروباص سواقه شغال عزرائيل خطوط 💀

وانا راجعه امبارح حصلي موقف قررت اشارك الكوميديا السودا بتاعته

.. أنا من الناس اللي بيجيلها Panic attack محترمه في المواصلات، بالذات مع زحمة الميكروباص وأصوات الناس، ومنظر الطريق السريع. يعني بركب من هنا وببدأ رحلة كفاح وتمارين نفس مع نفسي عشان أهدي ضربات قلبي واللعنه دي تعدي على خير. امبارح بقى، وقعت في ميكروباص سواقه من فئة "عرسان الجنة" اللّٰه يهديهم. مراهق طايش، لسه مطلع الرخصه ومصدق نفسه خطير ومفيش منه اتنين. السواقة عبارة عن غرز، وسرعة جنونية، والعربية بتتمرجح بينا يمين وشمال كأننا في ملاهي الشلال.لحد هنا والبانيك أتاك بدأت تشتغل وتطير النفس مني.. يقوم الكابتن يعمل إيه عشان يكمل الأجواء الروحانية؟ مشغل الأغنية الشعبية اللذيذة دي (إنسان كداب لـ جودي الليبية) على أعلى صوت في سماعات الميكروباص:"أنت إزاااي تجرحنييييي.. هان عليك تدبحنيييي ييي؟!"أنا عمالة أطوح يمين وشمال، وبحاول أخد نفسي بالعافية، وجسمي بيترعش من الهلع، وف نفس الوقت الكلمات بتخبط في ودني مع المرجحة والسرعة.. حسيت للحظة إن الأغنية دي هتبقى الموسيقى التصويرية لآخر مشهد في حياتي قبل ما نقلب!

من رحمة ربنا إني أول ما نزلت وروحت، النوبة بدأت تفك تدريجياً، وكل ما بفتكر الموقف والخلطة العجيبة دي (عيل مراهق طايش + مرجحة ميكروباص + أغنية تجرحني وتدبحني + تمارين تنفس للنجاة) بقع على نفسي من الضحك على الاستفزاز اللي عشته.

هو احنا ليه بنعاني في صمت جوه الميكروباصات مع الأغاني دي؟؟

وحد حصله ميكس الرعب والضحك ده قبل كده ولا أنا لوحدي؟