عارف إن فيلم ابن حميدو اللي بنضحك عليه لحد النهاردة، هو في الحقيقة عبارة عن "مهرجان ألش" على أفلام ومواقف كانت تريند وقتها؟ تعالوا نفك الشفرات اللي ممكن نكون بنسمعها ومش فاهمين أصلها:

​ الاسم والأفيش: الفيلم بالكامل تريقة على فيلم "حميدو" بتاع فريد شوقي. حتى الأفيش كان نسخة طبق الأصل، بس شالوا فريد وحطوا إسماعيل يس بنفس الوقفة! وزودوا كلمة "ابن" تريقة على فيلم عالمي اتصور في مصر وقتها اسمه "ابن كليوباترا".

​ عقدة "نورماندي 2": ليه كان بيقول "دكهة نورماندي ودي نورماندي تو"؟ لأن "نورماندي" كانت أشهر سفينة فرنسية غرقت في الحرب العالمية، فكانت رمز للنحس والدمار، وعشان كدة جابوا لقطة لسفينة ضخمة في الأول وبعدين صدمونا بـ "قشرة البندق" بتاعة الريس حنفي! 

​ معرفة قديمة: لما سمعه قال للشاويش عطية "إحنا معرفة من أيام الجيش"، ده مكنش إيفيه عابر، ده كان تذكير للجمهور بفيلمهم الشهير (إسماعيل يس في الجيش) اللي كان أول لقاء للثنائي المرعب ده.

​ حوار الأغاني والأفلام: المشهد العبقري بين زينات صدقي وسمعه كان عبارة عن "قائمة أفلام" (حبيب العمر، قصة حبي، ارحم دموعي، كاس العذاب).. الممثلة بتقول أسماء أفلام رومانسية ناجحة، وهو بيرد عليها بفيلم دراما كئيب لفاتن حمامة!

​ أصناف المخدرات: حتى المخدرات سموها بأسماء الأفلام! "موعد مع السعادة" كان فيلم ناجح جداً، أما "جمعية المنتفعين" فكان فيلم أجنبي فشل تجارياً رغم الدعاية، فإسماعيل يس حب يوجب معاهم ويقولهم الصنف ده "ممشيش عندنا".

​ الألشة الخالدة: وطبعاً مسك الختام لما سأل رمزي "عزيزة فين؟" فقالوا له "راحت ورا لاتانيا"، فـسمعه كمل الألشة: "وهي فين؟ ورا لاتالتة" (على وزن تانية وتالتة)!

‏وبالمناسبة إفيه عبد الفتاح القصري بتاع وماله الباز أفندي ده راجل أنا ذات نفسي استمناه  
لو راجعت المشهد هتلاقي مفيش كلمه استمناه، وان القصري قال اتمناه عادي، ودي من ضمن الامثله المشهوره لتاثير مانديلا، ان في حاجات كتير هتلاقي ناس كتير جدا مقتنعين انها حصلت، لكن في  الحقيقه محصلتش

​ابن حميدو مش مجرد فيلم، ده كان "كوميكس" متحرك بيلخص حال السينما في الخمسينات.

​تفتكروا لو الفيلم ده اتعمل النهاردة، كان إسماعيل يس هيألش على أفلام مين؟

ابن حميدو.. "الألشة" اللي عاشت ٦٩ سنة!