ലോകമെമ്പാടുമുള്ള കൂട്ടുകാരോടൊക്കെ നമ്മൾ കേരളത്തെപ്പറ്റി വല്ലാതെ തള്ളും. ഒടുവിൽ അതൊക്കെ വിശ്വസിച്ച് അവന്മാരങ്ങ് കേരളത്തിലേക്ക് ഫ്ലൈറ്റും ബുക്ക് ചെയ്ത് എത്തും.

പിന്നെ നമുക്കൊരു വിളി വരും: “മച്ചാനേ, ഞങ്ങൾ ലാൻഡ് ചെയ്തു! കാണണം കേട്ടോ. പിന്നെ ഫാമിലിയുമൊത്ത് പോയി നല്ല നാടൻ സീഫുഡും കഴിച്ച് രണ്ട് തണുത്ത ബിയറുമൊക്കെ അടിക്കാൻ പറ്റിയ ഒരു സ്ഥലം പറ.”

അവിടെ തീരും നമ്മുടെ പമ്പ്!

തിരുവനന്തപുരത്ത് / കൊച്ചിയിൽ ഫാമിലിക്ക് പറ്റിയ സ്ഥലം, സീഫുഡ്, ബിയർ ഇത് മൂന്നും കിട്ടും. പക്ഷെ സംഗതി മൂന്ന് വെവ്വേറെ സ്ഥലത്താണെന്ന് മാത്രം.

അടിപൊളി ലോക്കൽ വൈബിൽ നല്ല തണുത്ത ബിയർ വേണോ?

തരാം. പക്ഷെ ഫാമിലിയെയൊന്നും കൂട്ടാൻ പറ്റാത്ത, ഇരുണ്ട് നാറി ഒട്ടിപ്പിടിക്കുന്ന ടേബിളൊക്കെയുള്ള ഏതേലും ബാറിൽ പോകേണ്ടി വരും. അവിടുത്തെ ഭക്ഷണത്തിന്റെ കാര്യം പിന്നെ പറയുകയും വേണ്ട.

ഇനി നല്ല നാടൻ സീഫുഡ് വേണോ?

അതും തരാം. ഏതെങ്കിലും ലോക്കൽ കടയിൽ ക്യൂ നിന്ന്, വിയർത്ത് തിക്കിത്തിരക്കി ഇരുന്ന്, ഒരുമാതിരി സർവീസിനിടയിൽ നാക്ക് പൊള്ളുന്ന മീൻകറിയും കൂട്ടിയും ചോറോ ചപ്പാത്തിയോ തള്ളാം. കൂടെ ചൂടുവെള്ളമോ ലെമൺ ജ്യൂസോ കുടിക്കാം.

അതല്ല, ഫാമിലിക്ക് പറ്റിയ അന്തരീക്ഷവും വേണം, കൂടെ ഒരു ബിയറും വേണമെന്നാണോ?

എന്നാപ്പിന്നെ ഏതെങ്കിലും ഫൈവ് സ്റ്റാറിലേക്ക് വിട്ടോ. അന്യായ കാശും കൊടുത്ത് വലിയ വലിയ പേരിട്ട ഏതോ മീൻ വിഭവം കഴിക്കാം—ഡൽഹിയിലോ മുംബൈയിലോ ഒക്കെ കിട്ടുന്ന അതേ ടൈപ്പിൽ. പക്ഷെ നമ്മൾ ഈ തള്ളിയ കേരളത്തിന്റെ ഒരു ടേസ്റ്റും അവിടെ കാണില്ല.

സത്യത്തിൽ ഒരു ഒന്നാന്തരം കേരള കോസ്റ്റൽ ടൂറിസം സ്പോട്ടിന് വലിയ ആർഭാടമൊന്നും വേണ്ട:

നല്ല ഫ്രഷ് നാടൻ സീഫുഡ്

ഒപ്പം ഒരു തണുത്ത ബിയർ

കുടുംബത്തിന് ഒന്നിച്ചിരിക്കാൻ ഒരു ടേബിൾ

പ്രകൃതിഭംഗിയൊക്കെ ആസ്വദിച്ച് സ്വസ്ഥമായിരിക്കാൻ ഒരിടം.

ടൂറിസമെന്ന് പറഞ്ഞാൽ വെറുമൊരു ടാഗ്‌ലൈനോ ബ്രോഷറോ ഒന്നുമല്ല, അതൊരു അനുഭവമാണ്. ബീച്ചും കായലും ഗംഭീര ഭക്ഷണവും ഒക്കെ ഇവിടെയുണ്ട്. എന്നിട്ടും ഇവിടെ വരുന്ന ടൂറിസ്റ്റുകൾക്ക് ഫാമിലിയുമായി വന്ന് നോർത്ത് ഇന്ത്യൻ ഫുഡും കഴിച്ച് മടങ്ങേണ്ട ഗതികേടാണ്.

നമ്മൾ 'കേരള ടൂറിസം' എന്ന വലിയൊരു ബ്രാൻഡ് പണിത് ഭയങ്കരമായി മാർക്കറ്റ് ചെയ്തു. പക്ഷെ ആ ബ്രാൻഡിനൊത്ത യഥാർത്ഥ ഗ്രൗണ്ട് വൈബ് ഉണ്ടാക്കാൻ മാത്രം മറന്നുപോയി. ശ്രീലങ്കയും തായ്‌ലാൻഡും ഗോവയും ഒക്കെ ആളുകൾ പ്രിഫർ ചെയ്യുന്നത് അത് കൊണ്ടാണ് .