ယောလွတ်မြောက်ရေးတပ်တော် (YLA) ကို ဖွဲ့စည်းတည်ထောင်လိုက်ကြောင်း အသိပေး၊

===================

m.CDM စက်တင်ဘာ ၅ ရက်။

ယောဒေသအရေးကို ကိုယ်တိုင်ပုံဖော်နိုင်ဖို့နဲ့ စစ်ရေး လှုပ်ရှားမှုတွေကို ပိုမိုလွတ်လပ်စွာ ဖော်ဆောင်နိုင်ဖို့အတွက် ဟုဆိုကာ ယောလွတ်မြောက်ရေးတပ်တော် (YLA) ကို တည်ထောင်လိုက်ကြောင်း စက်တင်ဘာလ ၅ ရက်နေ့မှာ ထုတ်ပြန်ကြေညာခဲ့ပါတယ်။ 

ဒီတပ်တော်ကို ပြီးခဲ့တဲ့ဩဂုတ်လ ၁ ရက်နေ့ကတည်းက စတင်တည်ထောင်ခဲ့တာဖြစ်ပြီး၊ အမျိုးသားညီညွတ်ရေး အစိုးရ(NUG) ကာကွယ်ရေးဝန်ကြီးဌာန အောက်က ဂန့်ဂေါခရိုင် အမှတ် ၁၊ ၁၈ နဲ့ ၁၉ တပ်ရင်းတွေမှာ ၅ နှစ်တာ တာဝန်ထမ်းဆောင်ခဲ့တဲ့ ရဲဘော်တွေနဲ့ ဖွဲ့စည်းထားတာ ဖြစ်တယ်လို့ ဆိုပါတယ်။

အခုလို သီးခြားရပ်တည်ရတာဟာ NUG နဲ့ ဝန်ကြီးဌာနအပေါ်မှာ ယုံကြည်မှုမရှိလို့ ဒါမှမဟုတ် တာဝန်ရှိသူတွေနဲ့ ပဋိပက္ခ ဖြစ်လို့မဟုတ်ဘဲ ယောဒေသတွင်း တော်လှန်ရေးကို ပိုပြီး အာရုံစိုက် လုပ်ဆောင်ချင်လို့သာ ဖြစ်တယ်လို့ ဖော်ပြထားပါတယ်။

တပ်တော်ရဲ့ အဓိက ရည်မှန်းချက်ဟာ အကြမ်းဖက် စစ်အာဏာရှင်စနစ် အမြစ်ပြတ်ရေးနဲ့ ဖက်ဒရယ်ဒီမိုကရေစီ ပေါ်ထွန်းရေးဖြစ်ပြီး NUG လက်အောက်ခံ တပ်ရင်းတွေအပါအဝင် မဟာမိတ်တွေနဲ့ ပူပေါင်းတိုက်ပွဲဝင်သွားမယ် လို့ သိရပါတယ်။

လက်ရှိအချိန်မှာလည်း YLA အနေနဲ့ ချင်းပြည်နယ်တောင်ပိုင်း မင်းတပ်နယ်နဲ့ ယောဒေသ ကျောက်ထုနယ် တို့မှာ ဒေသခံတပ်တွေ၊ မဟာမိတ်တပ်တွေနဲ့ တစ်သားတည်း ရပ်တည်တိုက်ပွဲဝင်နေတယ်လို့ အသိပေးထားပါတယ်။

သတင်း - လူ‌လေး

ဓါတ်ပုံ - ယောလွတ်မြောက်ရေးတပ်တော် (YLA)

Formation of the Yaw Liberation Army by former Gangaw District PDF battalions