هل مبلغ 60 ألف جنيه يجيب شبكة خطوبة (3 قطع) في الوقت الحالي؟ ولا الموضوع صعب؟

السلام عليكم يا شباب،

أنا داخل على خطوبة قريب، والاتفاق في المنطقة عندنا مفيش فيه جرامات محددة أو "الشبكة بمبلغ كذا"، الشرط الأساسي بس إن الشبكة تكون 3 قطع (مثلاً: دبلة + محبس + خاتم/سلسلة).

ميزانيتي المتاحة حالياً للشبكة هي 60,000 جنيه.

مع أسعار الدهب الحالية (جرام 18 أو 21)، هل المبلغ ده ممكن يجيب 3 قطع خفاف جداً (أوزان خفيفة/مفرغة) بالمصنعية؟ ولا السعر ده بجد مش هيجيب حاجة خالص وهيبان قليل أوي؟

لو حد مر بنفس التجربة قريب أو عنده خبرة في أسعار الدهب والأوزان الخفيفة ياريت يفيدني:

1. هل فيه قطع أوزانها بتوصل لـ 2 أو 3 جرام للقطعة الواحدة وتنفع؟
2. اتعامل إزاي في المحل بحيث أطلع بأقل مصنعية وأقدر أجمع الـ 3 قطع؟
3. هل أفضل أجيب عيار 18 عشان ألاقي أشكال تشيل وزن خفيف؟

شكراً مقدماً لافادتكم.