زواج بنت خضيرية من قبيلي

انا حاليًا بعلاقة مع شخص قبيلي، نجدي من القصيم، والولد جدًا واضح معي من البداية بوش يبي من العلاقة وكيف يبي تمشي، ونيته بالنهاية الزواج.
أنا من عائلة غير قبيلية، بمعنى إننا اجتماعيًا ما ننتمي لقبيلة معروفة. عائلتي بذلت جهد كبير خلال السنوات الماضية عشان تعرف أصلنا، من تجميع وثائق وفحوصات DNA وتتبع للنسب، ووصلوا إلى أن أصلنا يرجع لقبيلة معروفة في السعودية، لكن عائلتنا ما تُعرف اليوم كفرع منها ولا تم ضمنا لها، بسبب اختلاط النسب قديمًا مع عوائل غير قبيلية.

مرة سألني هو: “وش ترجعون؟” وقلت له اسم القبيلة اللي وصل لها بحث أهلي، وما دخلنا وقتها في تفاصيل أكثر.
الحين بما إن الموضوع بيننا قاعد يصير جدي، بدأت أخاف جدًا من مرحلة الخطبة. أعرف إن بعض العوائل في القصيم ونجد عمومًا موضوع النسب والقبيلة عندهم مهم جدًا، وبعضهم ممكن يرفض المصاهرة من عائلة غير قبيلية حتى لو الشخص نفسه ما عنده مشكلة.

فودي أعرف من ناس مروا بنفس التجربة فعلًا: هل سبق أحد هنا تزوج/تزوجت من شخص قبيلي وهو/هي من عائلة غير قبيلية؟ خصوصًا إذا الطرف القبيلي من القصيم أو نجد؟ وكيف كان موقف الأهل لما عرفوا؟ وهل الموضوع انحل أو انتهت العلاقة بسببه؟

أنا أحب هذا الشخص، وبنفس الوقت ما أبي أضيع وقته ولا أضيع وقتي وأتعلق أكثر بشيء ممكن من الأساس ما تكون له نهاية بسبب أهله.

الموضوع مأزمني جدًا لدرجة إني ما قدرت أنام. فكرة إني ممكن أنرفض بسبب شيء ما كان لي أي اختيار فيه توجعني جدًا، وأبي أسمع تجارب واقعية من ناس عاشوا الموضوع، سواء انتهت بشكل كويس أو سيئ.
تكفون أبي تجارب فعلية، مو نقاش عن القبيلي وغير القبيلي أو مين أفضل من مين