هاتطلق بعد شهر جواز واحد

اتجوزت من شهر بعد سنة خطوبة كنت بحبها جدا جدا وهي كانت بتحبني

خلال فترة الخطوبة والدتي كانت مريضة بالسرطان ومعرفتش تحضر اي ترتيبات للجوازة كنت بجري ما بين خطيبتي وما بينها وهي في العناية وما بين الشقة

اتجوزنا وماما حضرت الفرح

بعدها ظهرت مشاكل في العلاج الزوجية

الانتصاب كان بيحصل بشكل طبيعي لكن الايلاج مكنش بيتم ولا القذف حاولنا مرتين ليلة الدخلة من غير فائدة

سافرنا بعدها اسبوع شهر عسل ورجعنا كان نفس الحوار بيتكرر

بعد ما رجعنا طلبت مني اروح اكشف وكشفت فعلا عند اثنين دكاترة وعملت تحاليل هرمونات وسكر وعملت اشعات سونار علي الخصيتين كله سليم عدا دوالي خصيتين بسيطة الدكاترة قالولي مالهاش علاقة وقالولي دي مشكلة نفسية وهاتتحل مع الوقت

بعدها مجاش يومين والدتي توفت .. توفت بعد اسبوعين من الزواج بالضبط

حسيت إن حياتي اتهدت بعدها

مشاكل العلاقة الزوجية متحسنتش

لحد ما زوجتي جت يومي الخميس والجمعة رفضت الجماع وصممت اني اعمل تحليل سائل منوي الاول لكن محصلش بينا اي خناق او مشاكل

الدكاترة كلهم قالولي التحليل ده مش مطلوب حاليا بيتعمل بعد سنة للخصوبة لكن حاليا الاهم تهدي نفسك ومتستعجلش ولا تتوتر وقت الجماع علشان الدنيا تمشي

المهم نمنا من غير خناق وقتها بعد ما رفضت الجماع

يوم السبت الاسبوع الي فات الصبح نزلت شغلي عادي وسلمت عليها الصبح .. في نص اليوم كلمتها مردتش عليا .. اتبلغت بعدها اخر اليوم انها سابت البيت وراحت لاهلها ورافضة ترجع البيت الا بعد عمل التحليل واهلها كذلك نفس الراي

بعدها بيومين كلموا والدي يطلبوا الطلاق

وهو مرضاش يقولي علشان عارف وقع الصدمة عليا

امبارح اتبلغت برفع دعوي خلع عليا ووقتها عرفت انها طالبة الطلاق من اسبوع

روحتلها النهاردة اكلمها قالتلي انها مش مبسوطة معايا ومكنتش مبسوطة خلال الشهر ده ومش عايزة تعيش معايا ومفيش رجعة

حاسس ان حياتي كلها اتهدت في شهر

والدتي توفت والجوازة الي كنت هاموت عليها بقالي سنة اتهدت بعد وفاة امي ب ٣ اسابيع مكملتش شهر جواز حتي

معدتش عايز اعيش