قررت أتكلم عن تجربتي

أنا من خمس سنين تزوجت واحد مب إماراتي وانتقلت لبلده قبل أربع سنين ومن ناحيتي ما حسيت بفرق كبير في العادات لأن أهله بدو وقريبين وايد من عاداتنا ولهجتنا مع وجود بعض الفروقات وأغلبها في اللهجة
أنا لي تقريبا سنتين أشتغل في بلد ريلي وبحكم إننا
ومن ناحيتي أشوف أجواءهم العائلية أحسن مني بوايد كل ويكند خوات ريلي ييون وسهر وضحك وعزايم وكل حد مرتاح وأنا في بداية الزواج كنت أشوف عمري شوي غريبة عنهم لكن الحين خلاص عادي صرت وحدة منهم وبطلت أستحي إجازة الصيف عندنا عبارة عن نادي صيفي في بيت حماتي كل حد داخل وطالع والصغار يلعبون في الحوش وكل شي أمان والشي اللي وايد فرق وياي إن مب بس خوات ريلي معتبراتني أختهم حتى بناتهم ييون يسهرون عندي ونطلع مع بعض وإذا بسافر أترك عيالي وياهم وأنا مرتاحة حماتي يوم أداوم تخلي البنات عندها وأنا أطلع وبناتي يكونن راقدات وأعطيها نسخة من المفتاح عشان تدخل تشوفهم وهالشي بالنسبة لي وايد يطمني
من ناحية الأكل موضوع الأكل كان شوي غريب علي في البداية الحين الألبان والأجبان ما نشتريها من شركات نجيبها من محلات مختصة فيها يعني وحدة تبيع هالأغراض وتكون مسويتهم في البيت وطعمهم صراحة يفرق وايد عن اللي نشتريه من السوبرماركت
الخضار والفواكه بعد في منها أشياء من حوش أهل ريلي وفي أشياء نشتريها من المزارع القريبة ومنها ناخذ من محل خضار عادي والحليب نجيبه فرش من ريال عنده حلال وكل أسبوع تقريبا نشتري منه ثلاث مرات وكل مرة نيب ثلاث لتر وطعمه لذيذ بشكل أما العيوب فأكثر شي يضايقني إني بعيدة عن أهلي والحياة مب بنفس مستوى الرفاهية اللي كنت عايشتنها في الإمارات والتعليم عندهم زين بس بالنسبة لي أفضل التعليم في الإمارات والمرافق والخدمات والحياة بشكل عام أحسها أحسن وأحلى والأمان بالنسبة لي بعد الإمارات غير ومن ناحية أهل زوجي أحس موضوع الخصوصية عندهم شوي غريب علي مرات يوم يكون الكل موجود أشوف البنات يفتحون الباب ويدخلون عندي من غير ما يدقون خصوصا يوم ريلي يكون برع البيت بالبداية كنت أستغرب بس مع الوقت تعودت
من ناحية الصحة أشوف عندهم وايد أشياء حلوة بس في أشياء نحن متقدمين عنهم فيها بشكل أكبر وبصراحة من تجربتي أشوف الحياة في الإمارات وايد أحلى بالنسبة لي ولو ريلي يقتنع إننا نرجع جان رجعت من زمان بس حاليا موضوع الرجعة صعب مع هذا كله من تجربتي أحب حياتي عندهم لأنها مريحة وهادية أكثر من الإمارات ما في زحمة سيارات لأننا في قرية وعيالي يلعبون برع وأنا متطمنة عليهم والجو عندهم فنان وأحبه وايد لأنه بارد
فهي لها إيجابيات وسلبيات بس إذا بتسألوني وين أفضل بالنسبة لي الإمارات تظل أحلى وتفوز بس حياتي هني فيها راحة وهدوء وأجواء عائلية وايد أحبها
في وايد جوانب أشياء ما تطرقت لها وما اعرف اشرحها بس تكلمت عن الأشياء الي أشوفها تفرق بحياتي