اخيرا تطور العراق وقررنا نعزز السياحة بالعراق عن طريق حاجة جديدة وهي التحرش بالسائحات 



وحسب الي فهمته التحرش بالسائحات ارث حضاري قديم بدايته كان التحرش بالعراقيات، حيث بسبب "اللبس و خروج المرأة بعد المغرب" العراقيين قرروا يتحرشوا بالنساء ونجحت هذه الطريقة وبالعكس الان النساء العراقيات شاكرات لهذه الظاهرة لانها خلتهن ملازمات للبيت خوفا عليهن من الخروج والانحراف لان اكيد المرأة اذا طلعت برا راح تنحرف وتتحرش بالعالم وعشيرتها تغسل عارها بعدين 



المهم بعيدا عن كل هذا الخريط، التحرش اكثر ظاهرة مستفزة منتشرة بمجتمعنا السامي العريق، ويمكن اكثر ظاهرة نتجاهل مسبباتها ونلوم بيها الضحية 

  
بهذا المقطع يظهرلنا مجموعة من الاطفال احباب الله الحبابين الي راح يكبرون ويصيرون اساس مجتمعنا يتحرشون ويضايقون احدى السائحات، واحد الاشخاص وصلت بيه الدرجة يلمسها

  
ومن هذي الحادثة نستذكر حادثة الكريسماس في بغداد و البصرة،  في البصرة رأس السنة هذي مجموعة تتعدى العشرات تحرشوا بطفلة عمرها ١٥ سنة بشكل جماعي بكورنيش شط العرب مستغلين التزاحم وهمين حطينا اللوم على الضحية واتهمناها بعرضها 

  
في البصرة ايضا راس السنة الفائتة بمدينة العاب القرنة لاند مجموعة بالعشرات تحرشوا بفتاتين الى درجة تمزيق  ملابسهم 

  
وفي بغداد باحدى المقاطع المشهورة تعرضت صديقة احد الفلوغرز المشهورين للتحرش اثناء التصوير 

  
—

  
وهذا كل الي حجيته خريط ومالكم علاقة بيه، الي اريد اعرفه شنو اسباب انتشار التحرش؟ وشنو حل هذي الظاهرة. 

يا قاضي الحاجات اقضي على العراق والعراقيين