١٩٦٥ جمال عبد الناصر part 1

هنبدأ سلسلة بوستات عن عصر جمال عبد الناصر، و يا ترى التاريخ وصفه صح ولا النضارة بتاعتنا غلط

نبدأ الحكاية بالتجارة العالمية قبل الحرب العالمية التانية، شكل التجارة كان بنفس النمط القديم، التهريب شغال، سفن العبيد موجودة، محدش عنده سلطة كاملة على سواحله، و كمان الرقابة الجوية منعدمة، التجارة الرائجة وقتها المواد الغذائية و المخدرات، زي حروب الأفيون على الصين و ما شابه، المهم، حه واحد بشنب و مشي، غير سياسات العالم، بقى التجارة الرائجة هي تجارة السلاح، بعدها المراهنات بعدها المخدرات، و هنا دول العالم حطت قواعد الملاحة و الطيران الدولية لحل النزاعات، و ظهور منظمان أممية تحاول تكبح الصدمة اللي حصلت.

بداية حكايتنا بقى من ٥٢، العالم كان متقسم ما بين أربع قوى، ٣ غربيين و هما فرنسا و بريطانيا و أمريكا، و شرقي واحد و هو الاتحاد السوڤييتي، في حالتنا في مصر بقى، مصر حست انها من الدول اللي هتحاسب على المشاريب بعد الحرب العالمية، عن طريق النكبة، فهنا تم ثورة ٥٢، في الأصل اتعملت علشان انشاء جيش قوي، و حصل، وقتها قوات بريطانيا قاعدة فى محافظات القناة بحجة حماية مصالح شركة القناة الفرنسية البريطانية.

علشان نحلل خطوات عبد الناصر صح، لازم نشوف الخريطة الاقليمية و العالمية وقتها، معاها التكنولوجيا العسكرية، و الميديا في الوقت ده.

هنبص على خريطة الحروب في الوقت ده اللي من غير تدخل مننا.

أول حرب معانا هي حرب الكوريتين ١٩٥٠ ، هنا ديه كانت اول حرب بالوكالة بين الفكر الليبرالي و الفكر الشيوعي، بدأت بمساعدة قوات كوريا الشمالية من الاتحاد السوڤييتي بالسلاح، قوات كوريا الشمالية كسبت جامد لدرجة انها حاصرت قوات كوريا الجنوبية كلها في بيوسان، هنا أمريكا اتدخلت و نزلت بشكل رسمي خلف خطوط كوريا الشمالية و كسبت قصادهم لغاية ما حاصرت قوات كوريا الشمالية على حدود الصين، و هنا الصين دخلت بشكل رسمي و ساعدت قوات كوريا الشمالية في الرجوع لغاية سيول، و انتهت الحرب سنة ١٩٥٣ بعد ما خلفت خساير ٢ مليون مدنى، حوالي نص مليون من كوريا الشمالية و كوريا الجنوبية برضه، مع ١٥٠ الف جندي امريكي، ٤٠٠٠ جندي من التحالف الدولي، حوالي مليون من الجيش الصيني، التحالف الدولي كان من ١٣ دولة، فمن النهاية احنا بنتكلم على حرب عالمية مصغرة، و كان اول اختبار حقيقي للأمريكان في مجاراة السوڤييت في كمية تصنيع الأسلحة، و فشلت، و ده كان السبب الرئيسي في رجوع الالمان للتصنيع العسكري، لمساندة قوات التحالف، و انتهت الحرب بحل صفري، هدنة بين الكوريتين على الحدود القديمة.

تاني حرب هي حرب الهند الصينية ١٩٤٥ ، محدش فينا يعرف المنطقة ديه اصلا، ديه الدول اللي بين الهند و الصين، ڤيتنام و كامبوديا و لاوس، دول كانوا تحت الاحتلال الفرنسي، في خلال الحرب العالمية اليابان احتلوهم، مع هزيمة اليابان، ظهر قائد لمجموعة وطنية اسمها ال Viet mahn و دول اللي سموا ڤيتنام عليهم، اعلن قتئدهم استقلال المنطقة سنة ١٩٤٥، فرنسا رفضت و دخلت في حرب معاهم، الحرب فضلت حرب عصابات و فرنسا مش قادرة بس أمريكا بتساعدها براحة لغاية سنة ١٩٤٩ لأن الصين اتقلبت حكم شيوعي، هنا أمريكا فتحت دعم غير محدود لفرنسا لمنع المد الشيوعي، لغاية ما حصلت معركة قاعدة ديان بيان ڤو سنة ١٩٥٤ اللي فيها قائد ڤيتنامي استخدم نفس تكنيك تحتمس التالت و فكك المعدات و مشي بين الجبال و حاصر القاعدة و دكها لغاية ما بعد ٥٥ يوم من المجازر فرنسا استسلمت و اعلان استقلال الدول ديه.

في النص بقى حصل تمردات و تم اخمدها زي الثورة المجرية ضد السوڤييت، الثورة الكوبية ضد أمريكا، حرب المارش ضد بريطانيا، الحرب الأهلية الصينية بين الصين و تايوان، كل دول انتهوا نهاية صفرية يعتبر، التمردات اخمدت، لكن كل ده عمل ثقل غير طبيعي على التصنيع العسكري، و خلى الدول مستنزفة من الموارد

ده غير انا اتكلمت عن الحروب اللي حصلت من غير تدخل مصر بشكل مباشر او غير مباشر، و جه في البوست الجاي