فقرة ما قبل النوم

طول ما عمري مطالب دايما ابقى عند المستوى المطلوب و فوق التوقعات ، بتهدد بالهجر من و انا طفل لو اتشاقيت و لا عملت دوشة ، بتعاقب علي اخطائي كأنها هتقوم حرب او هتعمل ازمة او ممكن تنهي العالم

كبرت و بقيت شحط و عندي خوف من الهجر ، بخش علاقات شبه مستحيلة و اعيد سردية الخوف ديه ، ادمنت الخوف لدرجة اني بصحى في نص النوم افتش في تليفوني عن اي رسالة وداع مبعوتة او بلوك اتعملي ، بصحى الف في الشقة ادور علي امي اشوفها سابت البيت و لالا ، حتى صحابي اهملت فيهم لحد ما فعلا مبقوش موجودين.

كبرت و بقيت اخاف اجرب حاجه جديدة خوفا من اني اغلط و اتعاقب مش عارف من مين بس خايف ، بخاف اتعلم حاجه جديدة لافشل فيها ، بخاف اخوض تجارب جديدة و بكتفي بالتجارب اللي دخلتها و بعيدها من تاني ، يعني مثلا انا بقالي ١٠ سنين باكل نفس البيتزا من نفس المحل بنفس الطعم و عمري ما فكرت اغير و اجرب حاجة جديدة ، بخرج في نفس الاماكن و بعمل نفس الحاجات بنفس الطريقة علشان بس نجحت معايا في مرة

مش بولول و لا بصيح .. انا بفضفض و في نفس الوقت بحاول افيد اي حد يقرا و يلاحظ حاجه من اللي عندي موجودة فيه فيتعاطف مع نفسه اكتر و يعرف ان ده مش ذنبه و يحاول يصلح اللي يقدر عليه و عذرا علي الاطالة ..