سؤال طويل في اتفاقات الجواز :)

إزيكم ✨️

محتاج منكم نصيحة ورأي يكون مبني على خبرة سابقة في مواضيع الاتفاقات بتاعة الجواز أو الخطوبة

دلوقتي أنا من القاهرة وبشتغل في Agency ومعيد في جامعة من اللي ب ٣ حروف، وفي أكتر من مكان مع بعض عشان أقدر أبني نفسي، والحمد لله ربنا كارمني من حيث الشغل والدراسة ومفيش اثنين بيختلفوا عليا سواء في تعاملاتي أو أخلاقي (مخلص القرآن كمان الحمد لله) أو حتى على مستوى الشغل.

من حوالي سنة ونص اتعرفت على بنت معايا في الشغل في الجامعة من اسكندرية، والبنت ما شاء الله على خلق والكل بيشكر فيها وفي أخلاقها وشغلها.. بحكم الشغل حصل تعامل أكتر من مرة لغاية ما اتشدينا لبعض وقولتلها إني هتقدملها لما أهلها ينزلوا مصر (أهلها مغتربين في السعودية وأهلي كانوا مغتربين برضو في السعودية لحد ما استقرينا في مصر من حوالي ٥ سنين)

المهم حصل فعلا واتقدمتلها فعلاً السنة اللي فاتت زي دلوقتي وشبه قرينا فاتحة (رحت لوحدي اسكندرية في أول مرة عشان أهلي ما قدروش يسافروا معايا لظروف صحية متعلقة بوالدي)، وحصل قبول ساعتها وباباها قالي خلاص اتعرفوا على بعض خلال السنة لغاية ما ننزل مصر تاني ونمشي في الاتفاقات

حصل فعلا واتعرفت على البنت خلال الفترة دي.. والدي كان ممانع وقلقان من الموضوع ده عشان مش ضامن الناس وكان معارض إنه أروح أخطب واحدة ما أعرفش العيلة بتاعتها ولا فيه مجال أعرفها، وإنه من باب أولى أشوف في محيط القرايب والصحاب والمعارف في العيلة بدل الناس الغريبة خالص، وأنا وقفت وأصريت إنه نحاول نشوف الناس دي ولو فيه خير الموضوع هيكمل

مرت الأيام وعيلتها رجعت من السفر وقولنا هنبدأ في إجراءات الاتفاقات والخطوبة، ووقتها اتفاجأت بوالدي قلبه مقبوض من الموضوع دا ومش حابب يدخل فيه وقالها صراحة أدخل لوحدي فيه ومش هيدخل في حاجة مش مقتنع بيها، ومع ذلك هيساعد عادي خالص في التجهيز ومفيش مشكلة بالنسبة له.. من هنا لهنا ربنا سهل ووافق ندخل نكمل في الموضوع عشاني (كان فات ١٥ يوم من أجازة والدها)

المهم كلمنا الناس واتفقنا مع والدها إنه ينورنا في القاهرة في البيت عندنا يقعد مع والدي يحصل نوع من التعارف بينهم عشان والدي مش هيقدر على المشوار لظروف صحية محددة الحركة، ووالدها مشكوراً وافق واحترم ده ونورنا وحصلت أول قعدة عندنا كان كلام عام جدا ووالدي مارضاش يفتح موضوع الجواز عشان ما يحرجش والدها إنه بيتناقش في الموضوع ده في بيت الولد

المهم عدى كام يوم وردينا ليهم الزيارة في اسكندرية(والدي وقتها أخد كمية مسكنات مهولة عشان يقدر على المشوار) وطلبنا إيد البنت رسمي من عندهم.. اتفقنا هنمشي بشرع ربنا

الشقة الحمد لله مِلك مجهزة ومتشطبة بقالها ٦ سنين، فمحتاجة وش بياض ولا حاجة، شوية إصلاحات بسيطة في السباكة، تتفرش وتتجهز بالعفش والأجهزة

والدها قال إن التجهيز على العريس قولنا تمام وقولناله من طرفنا كمان إن الشبكة هتبقى هدية ومش هتبقى من المهر.. كمان طلبنا إنه الخطوبة تبقى في القاهرة عشان الظروف الصحية مش هتخلي والدي يقدر على إنه يحضر في اسكندرية ووالدها وافق وقدر ده.. أما كتب الكتاب فكمان سنة أو سنة ونص بالكتير حسب الظروف، وخلصنا الزيارة على كدا على إنه والدها يتواصل مع والدي يتفق معاه على ميعاد ومكان الخطوبة وقيمة المهر عشان دول التقطتين اللي كانوا فاضلين

عدى يومين ووالدها تواصل مع والدي وقاله إنه الخطوبة ممكن نعملها كمان أسبوع وهتبقى عندنا في البيت (البيت عندنا واسع شقتين مفتوحين على بعض منهم الشقة بتاعتي اللي هتتجهز)، والمهر ١٠٠ جرام ذهب يسدد على ٣ ل ٥ سنين بعد كتب الكتاب

والدي قاله هنتشاور وهنرد عليك.. قعدنا مع بعض وحسبناها، واختصارا يعني والدي قلق من العيلة واستغرب من الطلب بعد التكفل بمصاريف التجهيز كاملة في شقة تمليك سواء فرش أو عفش أو أجهزة أو مطبخ، والشبكة والخطوبة..

فتاني يوم والدي تواصل مع والدها وقاله كل شيء قسنة ومصيب وأنهى الموضوع.. طبعا كانت صدمة لوالدها وقاله يبقى فيه نوع من التفاوض وللأسف عندنا في العيلة ممكن نتفاوض ونتكلم في أي حاجة ما عدا المهر عيب جدا نفاصل أو نتكلم فيه كلمة واحدة

طبعاً تواصلت مع والدها بيني وبينه ووضحتله الأمور كلها وقالي إنه مرن جدا في التعامل وإنه معندهوش مشكلة يمد المدة يخليها طول العمر.. وضحتله إنه دا هيبقى صعب جدا على شاب لسه بادئ حياته إنه يكتب على نفسه دين بيغلى كل سنة، وإنه كدا هيفضل طول عمره يسدد فيه

والدها ساعتها قاله إنه ممكن مع العشرة البنت تتنازل عن المهر وإنه لو الولد شاري هيوافق على طول.. وضحتله إنه الدين التزام بكلمة، وأنا مش هقدر أوعد بحاجة أنا عارف نفسي مش هقدر عليها على أمل ربنا يفرجها أو البنت تتنازل عنه مع العِشرة، وقفلنا الكلام بطريقة هادية إني هصلي وهدعي ربنا يوفقنا للخطوة الصح وهرجعله تاني

المهم والدي من بعدها مصر إنه مفيش أي تواصل أعمله مع والدها خلاص وإنه الموضوع منتهي، وإنه لو عملت كدا هيبقى غضبان عليا قدام ربنا وكلام من النوع ده.. فطبعاً فضلت ساكت وبعت للبنت رسالة اعتذار وضحتلها فيها كل حاجة وخلاص سكت على كدا

من كام يوم اتصلت عليا وقالتلي عاوزة تفهم أكتر اللي حصل، فوضحتلها كل حاجة وقالتلي إنه والدها عنده استعداد نتكلم تاني في المهر ونمشي الدنيا..

السؤال هنا محتاج رأيكم جدا هل الطلب دا طبيعي؟ إيه اللي بيحصل عادة في الجوازات والاتفاقات؟ هل الطلب دا مثلا منتشر في أماكن معينة أو في اسكندرية؟ أو أسيوط (عشان باباها من هناك بس عايش طول عمره في اسكندرية قبل ما يسافر الخليج)؟ الدنيا بتمشي إزاي؟ وفي الحالة دي إيه اللي المفروض يحصل؟

وبرضو محتاج أعرف الدنيا ماشية إزاي دلوقتي في الجواز؟ يعني ال average لشاب لسه بادئ حياته (٢٧ سنة) الدنيا بتمشي إزاي؟ ولو حد يقول المهر أد إيه والشبكة عمل فيها إيه والتجهيزات مشيت إزاي ياريت جدا...

طولت عليكم بس حاولت أحكي كل حاجة على أد ما أقدر :')