إزاي الواحد يعمل صحوبية عادية مع بنات بعد التخرج من غير ما الموضوع يبقى ارتباط؟

أنا 22 سنة ومتخرج من حاسبات من كام شهر، وفي حاجة مؤخرا خدت بالي منها واستغربتها شوية.
طول حياتي تقريبًا تعاملي مع البنات كان محدود، ولما كنت بقرب من بنت بشكل فعلي الموضوع غالبًا كان بيبقى في سياق إعجاب أو ارتباط. وأنا ارتبطت قبل كده كذا مرة، فمش سؤالي "إزاي أكلم بنت؟" أو إزاي ألفت انتباه واحدة.

الفكرة إني تقريبًا مجربتش خالص إن يبقى عندي بنت صاحبتي بس.
يعني واحدة نتكلم عادي، نبعت لبعض حاجات، ناخد رأي بعض، نتكلم عن games أو أفلام ومسلسلات أو شغل وحياة وأي كلام عشوائي، من غير ما يبقى فيه هدف في دماغي إن الموضوع لازم يتحول لارتباط.
الكلية غالبًا كانت أسهل مكان يحصل فيه ده بشكل طبيعي، بس أنا وقتها مكنتش اجتماعي أوي، ومكنتش بحضر غير لما أحتاج، ودلوقتي اتخرجت فمبقاش عندي البيئة دي أصلًا.

فالسؤال للناس اللي عندهم صداقات عادية مع الجنس التاني: هي بتبدأ إزاي فعلًا؟
قابلتوا بعض فين؟ وإزاي الموضوع بينتقل من إنكم مجرد ناس في نفس المكان أو نفس الـcommunity لإنكم تبقوا أصحاب وبتتكلموا بشكل منتظم؟

ولو التعارف أونلاين، مثلًا من Facebook group أو Discord أو community مشتركة، إمتى إنك تبعت private يبقى تصرف طبيعي، وإمتى بيبان كإنك داخل تعاكس؟
أنا مثلًا مجالي tech/data، وبحب gaming والأفلام والمسلسلات والأنمي، فطبيعي أفضل إن الصداقة تبدأ من اهتمام مشترك.

وبرضه للتوضيح، أنا مش منزل البوست عشان أدور على بنت هنا أو عشان حد يبعتلي DM. أنا فعلًا بحاول أفهم الناس اللي عندها النوع ده من الصداقات بدأ معاهم إزاي عمليًا، خصوصًا في مصر لأن علاقة الولد والبنت ساعات بتتفهم إنها حاجة رومانسية من أول خمس دقايق.
فلو عندك بنت صاحبتك أو أنتي بنت عندك صاحب من سنين والعلاقة فعلًا platonic، احكي بدأت إزاي.