انا في نهاية تانية ثانوي وفي خلال سنة اولى وتانية مرينا بالظبط ب76 امتحان شهر كانوا بهذا الشكل العبثي حل جماعي او تفتح الكتاب او ب chatgpt, gemani  
خلال اخر امتحانات شهر زادات نسبة الغش بشكل غشيم  
المدرسة كلها حرفيا كانت ماشية كده والطالب بقي عنده خبرة يعرف أنهي النماذج Ai بتحل غلط، وأنهي الأفضل  
وده هتلاقيه في كل المدارس دون استثناء  
ولو حد حاول يمنع الغش، فالأمر شبه مستحيل لأنك عندك 50 طالب قاعدين فوق بعضهم داخل الفصل

لما بنحضر مكنّاش بناخد بناخد شرح أو أي استفادة فعلية ولو حصل وتحققت المعادلة المستحيلة:  مدرس موجود ومؤهل علميا وتربويا وطلاب مش شاربين ولا محششين... فالمدرس مش هيقدر يستغل الوقت بسبب إلزامات الوزارة عليه فبيطر يكمل في المسرحية والسيناريو ويقضي الحصة في التقيمات والتصحيح ورصد الدرجات وتحشي الكراسة اي كلام  
والتقييمات نفسها كنا غالبا بننقل حلها من يوتيوب أو من بعض

ومن واقعي احد المدرسين كان كويس وبيشرح علطول ومش بيضيع الوقت ومؤهل علميا وتربويا ، وبيعرف يسيطر على الفوضى والبلطجة داخل الفصل وكان الوحيد الي بيقولنا "مش مهم عندي التقيمات ولا كراستك المهم عندي انت تفهم" بعدها المتابعين من الوزارة اكتشفو النصيبة الي بيعملها انه مش بيمثل معاهم في المسرحية واخد كلمتين مش حلوين منهم  
ومن بعدها حصته بقت تضيع هي كمان وسط نفس الروتين والتقييمات الشكلية.

أما امتحانات آخر السنة مفرقتش كتير اقل شويه في الغش بس في كل الأحوال بيقدر يغش الي ينجحه وكده كده عليها 30٪ من الدرجات فقط وفي مراقبين كتير بتخلي العيال تدخل بالكتاب والملزمة وتحل جماعي انت وصحابك عادي  
طب المراقبين ليه سايبنا؟ "لا ابرر ولكن احكي الي بيحصل"  
مثلا لما يقف عليك مدرس احياء وشايف الي شايفه من تدمير للعملية التعلمية ومادته تتلغي في اولى ثانوي وفي تانية ثانوي يتحط مكانها تاريخ لطلاب علمي بدل من احياء  
مستني منه يكون عند انتماء ازاي و بتاع وانت خربت بيته وخليته يسيب التدريس ويشوف اي شغلانه تانية

شوفت تسريبات كتير من بعض المدرسين في ليلة الامتحان بيحل معاك 3 نماذج بتلاقي زيها بالظبط في الامتحان  
وغير مدرسين في البداية بيقنعو طلاب يخدو عندهم درس بس لانهم بيدو الامتحان في النهاية، في منهم فعلا بيديه وفي الي لأ

في اعدادي وابتدائي مفيش فرق  
عن تالته اعدادي كنا بنعرف قبلها بيوم او يومين بنعرف الاسئلة الجاية في الامتحان وعلي اقل تقدير في بعض المواد بنعرف الموضوعات الجاية في الامتحان

وفي اللجنة الموضوع كان مفتوح لدرجة ان الي كان واقف علينا يجي يقولي كتبت السؤال المقالي؟ يديني ورقة ويقولي اكتبه هنا عشان تساعد زمايلك الواقفين فيه حرفيا كده واكتر مراقب منع الغش في اللجنة قام قسمنا مجموعتين من الي بيذاكر ال6 او ال7 انتو غشو من بعضكم براحتكم والي مش بيذاكر مجموعة تانيه، ده في اللجنة عادي كده

او مدرس الي بتاخد عنده درس يدخل للطالب في اللجنة قبل الامتحان بشويه بورقة فيها كل اجوبة الامتحان الطالب ده يحفظها يدخل يكتبها ويطلع من الأوائل

في الابتدائي حتي النهاردة حسب شهادات كتيرة من مدرسين اعرفهم، بيكتو للعيال بإيديهم اجابات لاجل فقط ان ينجحوهم ولو معملوش عيال كتير هتسقط وشكل المدرسة هيكون سيء علي الورق فالمدير بيجبرهم علي كده.

في مدارس كاملة معروف عنها انها بتغشش  
نفس تلك المدارس هتلاقي المحافظين والوزارة بيزروها وبيكرمو الاوئل فيها  
وأتاكدت من ده من احد قرايبي كان موجود فيها

ده واقع العملية التعليمة اليوم والي بقوله هنا مش إشاعات بل ما يحصل خلف الكواليس وما بمر بيه كطالب و حتي اليوم ده لسا بيحصل فمثلا كنا بنمتحن امتحانات خارج المجموع من يومين فأمتحان اللغة التانية اخدينه من المدرس الفلاني الي بيجيبه كل سنة في ليلة الامتحان "جاي بالظبط"  
وفي المواد الأساسية   بتعرف الأمتحان بمثابة ضغطة علي المجموعة في الواتس بتاعت المدرس الفلاني كنت لما بكلم المدرسين كده حرام ومش عدل والي اخره كنت بسمع حاجات زي طب اعمل ايه كله بيعمل كده "قصدة المدرسين التانين" وهما الطلاب عايزين كده واديها حاجة تخفف عن الطالب ليله الامتحان في وسط المناهج الكبيرة ديه  
  
 في اسباب كتير للي وصلنا ليه النهاردة... واحد الحلول اننا نقلل الامتحانات والتقيمات الحالية للنصف او اكثر وندرك كويس انها مش بكثرة الامتحانات والتقيمات بل مدي دقتها و نزاهتها وجودتها وهل تمر فقط غش وتسريبات ام هناك عدل يطبق علي الجميع  
وهذا سيكون افضل برضو بدلا من ان الطالب يخلص امتحانات يطلع علي امتحانات فنعطي وقت للمجتهد يلم المنهج وكذلك فالطالب ميكنش اعتماده علي الغش وميذاكرش

الغش كالماء والهواء